Tusarniaanerup sivitsorneqarnera Tanbreezip taperserpaa
Tanbreezip Nunatta kujataata kangiani suliniutissaa pillugu tusarniaaneq sivitsorneqassasoq qanittukkut aalajangertoqarpoq. Nalunaarusiat kingusissukkut tunniunneqarneri pissutigalugu politikerit akisussaasut aalajangerput soqutigisaqartut paasissutissanik nutaanik atuarnissaannut periarfissinneqassasut.
Allattoq Peter Troelsen, Simon Uldum
decembarip 09-at 2013 13:22
Tamannalu Tanbreezimi ajoriffissaqartinneqanngilaq. Kinguaattoortoqarnissaalu ajuusaarutigineqaraluartoq taamatut aalajangertoqarsimanera paasineqarluarsinnaasoq oqaatigineqarpoq.
-Tanbreez avatangiisinut ajortumik sunniinissamut soqutigisaqanngilaq, tamanna Kalaallit Nunaata kujataani tusarniaannerni uppernarsereerparput. Suleriaatsit ataqqigatsigit, isumaqarpugut pingaaruteqartoq susassallit ataatsimoortut ataasiakkaallu apeqqutissatik saqqummiussinnaassagaat, taamaasillutalu uagut apeqqutit assigiinngissitaartut pitsaasumik akisinnaaniassagatsigit, Tanbreezimi ujarassiuut pisortaat Greg Barnes nassuiaavoq.
