Tusarniaanermut killiliussaq sap.ak. marlunnik kinguartinneqarpoq

Tusarniaaneq qallunaatuinnaq oqaasertalik, akinissamullu ullunik marlunnik periarfissiineq. Nunaqavissut Sulisitsisut Peqatigiiffiata NUSUKA-p naammagittaalliuutaa, Inuussutissarsiornermut Pisortaqarfiup paasivaa, septembarillu ulluisa pingajuannut kinguartitsilluni.

Nukissiorfiit Namminersornerullutik Oqartussaniit ingerlanneqarunnaarlutik piginneqatigiiffittut ingerlalernissaat pillugu tusarniaaneq inatsisartut ukiaru ataatsimiissutigissavaat.

Tusarniaanermik allannguineq pillugu Inuussutissarfiornermut Pisortaqarfimmi Pilersuinermut immikkoortortami allaffimmi pisortaq Bent Sørensen oqarpoq.

- Nassiunniarneqarneri ajornartorsiutaasimavoq, siusinnerusukkut nassiunneqartussaasimagaluaramik. Kisianni kingulliit aaqqissuunneqarneri filit ammarneqarsinnaasimanngillat ilaatigut nassiunneqarnerat kingusinaalaarsimalluni. Kisianni aamma paasinarsisimavoq sualummik nukissiuuteqarnerup tungaatigut iliuusissanik pilersaarusianillu imalik nutartigassaasoq, Bent Sørensen oqarpoq.

Kinguartitsinermut tunngatillugu tusarniaaffigineqartut allannguutissanik siunnersuuteqarsinnaajumaartut. Nassuiaatit siunissami Nukissiorfiit qanoq ilusilersorneqarnissaannik imalik, inatsisartut oqallisilerpata siunnersuutinik suliniutit suut aallartinnissaannik imaqartussatut aamma takorloorneqarpoq.

- Nukissiorfiinnaanngitsoq, aamma nukissiuuteqarnermut, soorlu aqutsermi ataqatigiissaarinermut tunngasut aamma nalilerneqassapput, assersuutigiinnarlugu massakkut Nukissiorfiit suliassat ilaat nalinginnaasumik allaffissornikkut inissisimasinnaasut tigummiarpaat, assersuusiorpoq.

Pisortat sinnerlugit aalajangiisarnerit qangatut Nukissiorfiit ullumikkut namminneq akisussaaffigaat.

- Eqqaasinnaavara Nukissiorfiit ingerlanneqarnerata allanngortinnissaanut siunnersuut Inatsisartuni marlussoriarluni saqqummiunneqartareernikuummat. Siornatigut piffissaasorineqarsimanngilaq, kinguartinneqarsimallunilu. Massakkut nukissiuutit ataavartut pillugit ilisimasaqarneq pingaaruteqaraluttuinarpoq. Nukissiorfiit aamma malugisimavaat, taamaattumillu ”sinaakkutassarisaat” qiviarneqartariaqalersimapput, Inuussutissarfiornermut Pisortaqarfimmi Pilersuinermut immikkoortortami allaffimmi pisortaq Bent Sørensen oqarpoq.

Oqallinneq ullumikkut ingerlaatsimik allanngortitsisinnaavoq.

- Inatsisartuni eqqartorneqariarpat qanoq inassuteqartoqaatit inneri takoriarlugit suliassat aallartisarneqassapput, misissueqqinnerillu ingerlanneqassallutik, Bent Sørensen taama nassuiaavoq.

Naatsorsuutigineqarpoq tusarniutigineqartut kalaallisuui ataasinngorpat aggutsip ulluisa 27-anni nassiunneqarsinnaassasut.

Nukissiorfiit piginneqatigiiffinngornerani innuttaasut, suliffeqarfiit privatit pisortallu ingerlataat, angallannermut tunngasut kalluarneqartussaammata Sulisitsisut Peqatigiiffii NUSUKA, ILIK GA-lu tusarniaanernik akisassanik nutaanik nassissorneqassapput.