Tusarniaanerit unnugu aallartinneqassapput

- Qinnuteqaatitta Naalakkersuisunit tamanut ammasumik tusarniutigineqarnissaa aalajangiunneqarmat nuannaarutigeqaarput, True North Gems Greenlandip allaffissornikkut pisortaa Bent Olsvig Jensen oqarpoq.

- Rubineqarfiup aappalorujuttunillu safireqarfiup Aappaluttup suliniutigineqarnera innuttaasunut maanna saqqummiussinnaanngorparput, aamma tamatta ammasumik oqalliseqatigiissinnaanissarput neriuutigaarput, Bent Olsvig Jensen oqarpoq, taassumalu ilanngullugu neriuutiginerarpaa, suliniut pillugu kikkut tamarmik paasissutissanik pissarsisinnaassasut, paasissutissallu paasiuminartuussasut.

- Kikkut tamarmik sunik pilersaaruteqartoqarneranik paasisaqarsinnaassapput apeqqutissaqarunillu apeqqutilliisinnaassallutik. Taamaattumik Naalakkersuisut isumaqatigalugit, Aatsitassanik Ikummatissanillu Pisortaqarfiup tusarniaalluni ataatsimiisitsinissai sioqqullugit uagut nammineerluta paasissutissiilluta ataatsimiisitsisassaagut, Bent Olsvig Jensen nassuiaavoq.

Pilersaarutip siullermeersumik oqallisiginissaa unnugu periarfissaavoq, ataatsimiisitsinerlu siulleq taanna pissalluni Qeqertarsuatsiaani katersortarfimmi nalunaaqutaq 19.30. Atatsimiisitsineq tulleq aqagu unnukkut Paamiuni katersortarfimmi pissaaq kingullertullu sisamanngorpat Nuummi katersortarfimmi ataatsimiisitsisoqassalluni.

True North Gems Greenland facebookimi quppernermik aamma pilersitsisimalerpoq, pilersaarutillu tassani atuarneqarsinnaallutik.

Rubinit pillugit suliniut septembarip aqqaneq aappaata tungaanut tusarniaassutigineqassaaq.