Tusarniaaneq pingaarutilik tallimanngornerup unnukkuanut toqqorpaat
London Mining aatsitassarsiorfiliornissamut qinnuteqarpoq tassanilu sulisut 3.000-it missaanniinnissaat ilimagineqarpoq. Nuummi pissutsit kalluarneqangaatsiassapput ilaatigut peqqinnissaqarfimmi sullissineq sunnerneqarsinnaalluni. Maanna tusarniaalluni ataatsimiisitsineq tallimanngornermi unnukkut pisussanngorpoq inuppassuit tuttunniarlutik angallateruttulerfiisa nalaani. Piffissaq akunnappoq. Taamatullu ataatsimiisitsinissap pilersaarusiornera Kompetance Kompagniet-imut Naalakkersuisut suliakkiissutigisimavaat.
- Suliakkinneqaratta ullut ataatsimiisitsiffissat aalajangersorneqareersimapput taamaammat tassunga tunngasoq sunniuteqarfigisinnaanngilarput. Ullut ataatsimiiffissat inissinneqarsimapput Aatsitassanut naalakkersuisup Ove Karl Berthelsenip ullut najuuffigisinnaasai najoqqutaralugit. Aamma illoqarfiup qeqqani taamatut ataatsimiisitsiffiusinnaasunik pissarsiniarsimagaluarpugut iluatsinngitsumik. Taamaammat Ilisimartusarfimmi illutagissaarsumi ataatsimiiffissaqqissumilu tamakku pissapput. Neriuutigisimavagaluarparput kingullermik ataatsimiinnermi najuuttunit 60-init taakkunanngalu 20-it atorfiliusunit amerlanerit takkussimanissaat, Kompetance Kompagnietimiit Hans Peter Poulsen oqarpoq, taassumalu ataatsimiinnissap ullulerneqarnera sumiinnissaalu annerusumik isummersorfigerusunngilaa.
Inuiaqatigiit isaannit isigalugu eqqumiiginarsinnaavoq aatsitassanut naalakkersuisup septemberip aallartilaarnerani tallimanngornermi unnuk atornagu ullormik allamik toqqaasimannginnera. Tassami Naalakkersuisuni ilaasortaaqatai kujataani qinersisartunik ataatsimiisitseqqammerput. Allaat pasitsaanneqarsimasinnaavoq qineqqusaarneq aallartisalereersoq Ove Karls Berthelsenimut pingaarnerusimassasoq nunatta oqaluttuarisaanerani aatsitassarsiorluni suliassat annersaanniit.
Ulloq tamaat KNR.gl-mit Ove Karl Berthelsen oqaaseqartinniarsimagaluarparput tutsiuttutuaavorli allattaa paasiniaasoq tusagassiortoq kina apersuiniarnersoq paasiniarlugu sianertoq. Tamanna tusareerlugu aatsitassanut naalakkersuisoq uunga oqaluttuamut oqaaseqarniarluni tutsiutinngilaq tusarusussimagaluarparpummi sooq tallimanngornermi unnukkut tusarniaaneq pingaarutilik ingerlanniarneraa.
