Tusarniaaneq peqatigiiffimmit naammagisimaarneqarpoq
- Piffissaq ungasinnerusoq eqqarsaatigalugu nuna tamakkerlugu iliuusissatut pilersaarusiornissamik pilersaarutinut, politikerit najuuttut ullumi oqariartuutaat nuannaarutigilluinnarpagut, politikerillu isumaqataapput, kalaallinut ajornartorsiortunut ingammik kalaallit meerartaannut suliniarnerup aningaasanut inatsimmut ilanngunneqartariaqarnera politikerit isumaqataaffigaat, suliniutissattut aningaasaliissutinit isumalluuteqarunnaarniassammatam, Foreningen Grønlandske Børnimi allattaanerup tullia, Sisel Lea Nielsen oqarpoq.
Politikerit partiinninngaanneersut tamarmik Liberal Alliancekkut kisimik pinnatik tusarniaarnermi peqataapput, tamarmillu isumaqatigiissutigaat Danmarkimi kalaallit meerartaannut suliniarneq aningaasanut inatsimmi aalajangersimasumik aningaasalersorneqartariaqartoq. Isumaginninnermulli ministeri Karen Hækkerup nuna tamakkerlugu iliuusissatut pilersaarummik maanna pilersitsinialeraluarluni, suliniutip aningaasalersorneqarnerata allanngortinneqarnissaa itigartippaa. Tamaakkaluartorli oqariartuutit peqatigiiffimmiit naammagisimaarneqarput.
- Suliassaqarfimmut tunngatillugu politikerit nalunaarutaat ataatsimut isigalugu naammagisimaarpara. Oqartoqarsinnaavoq ukiup ataatsip ingerlanerani iliuusissatut pilersaarut piareersimajumartoq, uagutsinnullu ajunngilaq, suliavut suliniutissatut aningaasaliissutiniit aningaasalersorneqarallarpata, aqqissuussinerullu aalajangersimasunngortinneqarnissaa sulissutigiinnassavarput.
Danskit kalaallillu kommuniisa nalunaarfigeqatigiittalernissaat pillugu ministeri Ilaqutariinnermut Naalakkersuisumut Mimi Karlsenimut aamma attaveqareersimavoq. Tamannalumi aamma peqatigiiffimmit naammagisimaarneqarpoq:
- Taamaatut iliuuseqarneq pitsaasuuvoq, uagullumi taamaaliortoqarnissaa aamma kaammattuutigisimavarput. Kalaallit danskilluunniit meerartaasa nunat taakku marluk akornanni nuuttarnerminni sumiginnagaannginnissaat pingaaruteqarpoq. Takusinnaavarput suliniummi "Et godt Liv i Danmark"-mi meeqqat peqataasimasut tallimararterutaat Kalaallit Nunaannut angerlarsimasut, kisimiillutik imaluunniit ilaquttatik ilagalugit. Utereeraangatali ilisimaneq ajorparput taakku qanoq ingerlariaqqissimanersut.
Folketingep Isumagininninnermut ataatsimiititaliaa peqatigiiffimmit aqagu naapinneqassaaq, tassanilu suliniutissaq tullinnguutttoq "Et godt Liv i Danmark 2" saqummiunneqassaaq.
- Neriuppunga taakku ullumikkutulli suliniarfigut eqqumaariffigiumaaraat, suliniarnissamullu nutaamut aningaasaliissutissanik ilungersuuteqarnitsinni tapersersorluta. Aammattaaq neriuutigaarput tamanna pillugu aningaasaqarnikkut politikikkullu tapersersuiumaartut, Sissel Lea Nielsen oqarpoq.
