Tusarnaartitsisunut nittartakkakkut inniminniisarfeqalerpoq
Inniminniisarfimmi Atlantic Music Agencymik taaneqartumi tusarnaartitsinermik aaqqissuusserusuttut, internetikkut nipilersortartunik attartugassarsiorsinnaapput. Periaaseq soorlu illoqarfiit nalliuttorsiornerinut aaqqissuussinernullu assingusunut atorneqarsinnaavoq.
- Nipilersortartut allaffilerinermut piffissaajarpallaaratik nipilersorneq aalluttariaqarpaat. Tamatumunngalu uagut ikiuussinnaavugut, Atlantic Musicip pisortaa Ejvind Elsner Sermitsiap nittartagaanut oqarpoq.
Tamatumunnga peqatigitillugu inniminneeriaatsikkut nipilersornermik soqutigisaqartut aamma ikiorserneqarsinnaapput.
- Nunatsinni nipilersoqatigiit nipilersortartullu amerlaqaat. Taamaattorli nipilersoqatigiit suli ingerlanersut sumiluunniit takuneqarsinnaasanngilaq. Inniminniiffissamik pilersitsinikkut nipilersortartut suli ingerlasut allattugaatilissavavut, Ejvind Elsner oqarpoq.