VIDEO Tusarnaartitsisoqarnerani inuinnaat isissutissanik tuniniaasut isertitsilluarput

Sapaatip akunnerata naanerani Katuami tusarnaartitsisoqarpoq. Tusarnaariarnissamulli isissutissanik akii sinningaatsiarlugit Facebooki aqqutigalugu tuniniaasartut billeteernianit iluarineqanngeqaat.

Nipilersortut appisimaaleruttornerini facebookimi isisissutissat tuniniarneqartut amerlatseruttorput.

- Soorunami kusanaappoq, kisianni inerteqqutaannginnami suneqarsinnaanngillat, Christian Elsner Atlantic Musicimit KNR-imut oqarpoq.

Akisuanerit Festivalimut tusarnaariarneqarsinnaasut nuannarineqarluartut arlaqarput. Taamatullu isissutissat pisiarineqarsinnaasut nungulertupallassimallutik.

- Assut ingerlalluarsimavoq. Sisamanngormat 800-t missaanni isersimapput, taanna tupannalaaqaaq sisamanngornermi taamak amerlatigisinnaasut. Taava tallimanngormat arfininngormallu unnummut 1.200-t isersimapput, Christian Elsner oqarpoq.

Inuinnaalli facebook aqqutigalugu tuniniaanerat facebook-gruppemit unitseqquneqarpoq.

Tusarnaartitsinerit soqutigineqarluarsimapput. Inuinnaallu facebook aqqutigalugu akisunaaralutik tuniniaalluarlutik.

- Ippassaani takuara Dizzy Mizz Lizzymut ataaseq 2.000 kroneqarsimasoq. Tassami arfininngornermut isernermut. Assut ingasappoq taanna, Christian Elsner oqarpoq.

Taamatuullu taakku tusarnaariarusuttut tusarnaariartunit allanit akiliinerussappata inissaminiissorineqanngilaq.

- Tassami nallinnarput taamak akisutigisumik pisisartut, ilaatigut soorlu 2.000 kroneerlutik tusarnaariartartut, taanna ingasagaarput soorunami, Christian Elsner oqarpoq.

Isissutissalli pisiarereernermi tuniniaqqinneqarsinnaannginnerannut inatsiseqanngimmat maannangaaq qanoq iliortoqarsinnaanngilaq, inatsiseqalissappalli pisisartumut iluarnerussaaq.

- Uagutsinnut assigiinnarpaa, kisianni tusarnaariartunut sunniuteqarnerpaagami immaqa taakku eqqarsaataanerupput, Christian Elsner oqarpoq.

Inuinnaali isissutissanik tuniniaasartut pillugit isissutissanik niuertartut qanoq iliuusissaaleqipput.

- Iliuuseqarpiarsinnaannginnatta inerteqqutaannginnami. Eqqarsaatiginikuugaluarparput aamma inuk ataaseq ataasiinnarmik pisisinnaassasoq, ilai ilaa qulinik pisisaramik akiginiaaniassagamik kisianni taamaaliorsinnaannginnatta, Christian Elsner oqarpoq.

Nipilersortartut nuannarineqarluartut appittussaatillugit Katuaq mikivallaarsorineqaraluarpoq periarfissagissaarnerulluili.

- Tassa aalajangernikuuarput Katuamiissasoq, pissutigalugu halimiissagutta ataatsip tungaanuunaasinnaasarami, taanna uagut tulluartippallaannginnatsigu festivalitsinnut, Christian Elsner oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat