Tusarnaartitsinermi tusarnerluinnartut tulleriiaarneqartut

Katuap inersuaaraani nipigilluinnartumik tusarnaartitsisoqarmat nipilersortut ukuupput, tumerparpaartoq Martin Andersen, pattattoralugu Søren Christiansen, qatitoortoralugu Eske Nørelykke, saxofonertoralugulu nipilersullammak Jan Harbeck.

Nipilersuutit atorneqartut innaallagiaq atorlugu nippassaateqannginnerat tusarnaartunut  annertuumik iluarusutsitsivoq, nipilersorneranni nipilersuutit nipiliornerat allanartumik imminnut akulerullutik  nipeqalertarerat iluarusutsitsilluni. Tusarnaartitsinermi nipilersortut kisimiillutik nipilersornissaat aamma inissaqartinneqarpoq, Jan Harbeck kisimiilluni nipilersugassaq atormagu torrallaalluinnarpoq.  

Tallimanngormat arfininngormallu nipilersortartut Nunatsinneersut neqeroorfigineqarput jazzimik nipilersortartut nipilersoqatiginissaannut, nipilersortartullu arlaqartut peqataarusussimapput. Nipilersortartut nipilersoqatigiillutik isummersoqatigiinnerat eqqassaatinik nutaanik pilersitsivoq, Jan Harbecks Quartetimuinnaanngitsoq aammali maani nipilersortartunut. Nipilersortartut suleqatigiitsinneqarneranni arlaqartut peqataasimapput.

-Soorlulusooq nipilersuutit qaleriiaarneri qalleqqinneqartut taamatut piginnaasalinnik allanik nipilersoqateqarnissamut periarfissinneqaraangatta. Neriuutigaara uattulli iluaqutigitigisimassagaat, ullullu marluk suleqatigiittoqarneratigut isumassanik nutaanik pisimassasut. Misigisimavunga tusarnaartitsinnginnitsinni inuttut orsersorneqarlunga, taama Jan Harbeck knr.gl-imut oqarpoq.

Erinarsuutit atorneqartut qangaangerusoq jazzimik nipilersugassiaapput, soorlu Duke Ellington, Cole Porter, Benny Goodmann aamma Sidney Bechet nutarsarlugit nipilersoqqineqarput. Tusarnaartitsinermi pikkorissuseq, qanilaalluseq nipilersoqatigiilluarnerlu tunngavigineqarlutik. Tusarnaartut nuannarilluinnagaanik. Nipilersortartullu tusarnaartitsereeramik nuannarineqangaangaramik ingerlaqquneqanngikkaluarput.

- Kalaallit Nunaanni nipilersorluni misigisaq assorsuaq nuannerpoq. Nipilersoqatigiinnerput ilorrisimaarnarpoq, tusarnaartullu unnuk manna qisuariaataat ajorisassaanani. Taamaattumik unnuk manna nipilersortartuulluni qiimmallannarpoq. Nuutseeraliagut marluusut tigulaariffigilaarpagut, saniatigullu Nuumukarnitsinni misigisanik eqqaamasassatsinnik tunineqarluta. Uteqqikkusussinnaavunga  illoqarfik, pinngortitarsuaq, inuillu nalissaqanngitsut siumornikuunerat pissutigalugu, taama Jan Harbeck.