Tusarnaartitsinermi pakkuutaarrattut

Timersoqatigiiffik Nagdlúnguak aamma Qaasuitsup kommunea iluliarmiut meerartaannut juullimi tunissuteqarput akeqanngitsumik tusarnaartitsinermik.

Nipilersortuusut tassaapput cd-mik saqqummersitserlaat Disco Bay Blues Divas peqatigalugit appisimaartut. Tusarnaartitsinermi nipilersorputtaaq "Uummat" Aasianneersut.

Tusarnaariat 300-ut missaanniittut katersuussimanerat iluatsillugu pitsaaliuisunit paasitsiniaasoqarpoq. Qaasuitsup kommuneani pitsaaliuinermut siunnersorti eqqaasitsivoq meeqqat sinilluartarnissaat, nerilluartarnissaat minnerunngitsumillu asanninnermik tunineqarnissaat pingaaruteqarluinnartoq.

- Tusarnaariat taava inanneqarput imminut pakkutaaqullugit. Pikkunaqaarlu takullugu meerarpassuit angajoqqaaminnut arpaannaq pakkutsikkiartortut, taama KNR.gl-imut oqaluttuarpoq Nagdlúnguami siulittaasoq Lena Ravn Davidsen.

Tallimanngornermi unnunnulerulermat nipilersortartut appisimaaqqipput pikkunavimmik inersimasunut tusarnaartitsillutik.

Disco Bay Blues Ilulissani angerlarsimaffeqartut uani sapaatip akunnerani Nuummut timmisartussapput talllimanngornermi unnukkut suliffeqarfiit assigiinngitsut kulturip illorsuani Katuami julefrokost-ilerpata Divas peqatigalugit nipilersortuussallutik.

Divas tassaapput Nina Kreutzmann Jørgensen, Kimmernaq Kjeldsen, Tupaarnaq Mathiassen aamma Varna Nielsen.