Tusagassiuutit oqaatsinut politikkeqalernissaat kaammattuutigaa

Tusagassiornermik Institutimi Ilimmarfimmiittumi ilinniarnermi kalaallisut qallunaatullu oqaatsinik atuinissamik ilinniarneq ilaareersoq.

- Ulluinnarni sungiusaatini atorneqartarput, aammalu tusagassiortut oqaasii immikkut ilinniartitsissutigineqartarlutik, Naja Paulsen oqarpoq.

Københavnip Universitetiani oqaatsinik ilisimatooq, Arnaq Grove Radioaviisikkkut qanittukkut oqarpoq, kalaallit oqaasii tusagassiutini ima ajortigisumik atorneqartut, inuiaqatigiinni oqallinermi inuit ataasiakkaat katataasimassasut ernummanarsilluni.

Arnaq Grove nangilluni oqarpoq, tusagasiutini oqaluttuarineqartut qallunaatuumiit nutsigaakkajuttut, amerlasuutigullu kalaallisuunngortinneri paasissaaneq ajortut.

Tusagassiornermik institutimi pisortap tamanna isumaqatigaa. Aammali tusagassiortut kalaallit arlariinnik oqaaseqarnermikkut marloqiusamik sulisariaqartarnerat tikkuarpaa.

- Kalaallit tusagassiortut tupinnanngitsumik ajornannginneq ujartarpaat, tassalu allaaserisatik qallunaatut allariarlugit, nutserisumut nassiulugit. Taamaalillutik qallunaatut oqaatsit aaqqissuisoqarfimmi naalaganngortarnerat. Tamanna oqaatsinut politikkeqalernikkut aaqqinneqarsinaavoq. Assersuutigalugu aviisip naqinnginerani, allaaserisat kukkunersiortarnissaat pisussaaffiusariaqarpoq, Naja Paulsen oqarpoq.

Nunatsinni tusagassiortussanik ilinniartitsisup maanna tusagassiortooreersut ima oqaappai.

- Tusagassiortoq suliassaqarfimmini perorsagaavoq oqaatsiminik atuinini iluamik paarissagaa. Akisussaaffik suliameereerpoq, tusagassiortoq sakkuminik iluamik atuinissamut piumassuseqarnersoq apeqqutaaginnarpoq, Naja Paulsen oqarpoq.