Nuummi Ilulissanilu mittarfiit naatsorsuutigisamit siullermit akisunerungaatsiassarpasipput.Assi: KNR/ Christine Hyldal

Tusagassiuutit: KAIR mittarfinnut atugassanik milliardingajannik saniatigut atorusuttoq

Kalaallit Airports International Nuummi Ilulissanilu mittarfissanut saniaitgut 900 millionit koruunit tikillugit atorusuppoq. Tamanna missingersuutit pingasoriaatingajaannik qaangiineq assigaa.

Nunatsinni illoqarfinni annerpaani marlunni mittarfinnik sanaartorneq naatsorsuutigisamit akisunerungaatsiartussanngoriataarpasippoq.

Kalaallit Airports International A/S Nuummi Ilulissanilu mittarfissanik ingerlatsisoq aningaasat 3 milliardit koruunit missaasa saniatigut aningaasanik niuerfimmit 900 millionit koruuninik atorniaqqippoq.

Sermitsiaq.ag taama allaaserisaqarpoq.

Kalaallit Airports International A/S-ip aningaasaqarnera

Nuummi Ilulissanilu mittarfiit nutaat Namminersorlutik Oqartussanit danskillu naalagaaffianit Nationalbankenikkut Nordisk Investerings Bankikkullu atornikkut pigineqarput.
 

Namminersorlutik Oqartussat: 1,400 mia. kr.
Naalagaaffik: 700 mio. kr.
Nationalbanken (taarsigasseeqqinneq): 450 mio. kr.
Nordisk Investerings Bank (atorneq): 450 mio. kr.

Katillugit: 3 mia. koruunit.

Tamanna maanna Naalakkersuisuusimasut Aningaasanut Akileraartarnermullu ataatsimiititaliami Sanaartornermut ataatsimiititaliamut siunnersuummik taperseeqqusisimasut akuersineratigut pivoq.

AAMMA ATUARUK Ilisimatuut: Mittarfissuassat atulerpata Kalaallit Nunaata aningaasaqarneranut iluaqutaassapput

Ineqarnermut attaveqatigiinnermullu naalakkersuisuusimasup, Karl Frederik Danielsenip (S) tusagassiuutinut nalunaarutaa naapertorlugu mittarfiutileqatigiiffiup suliassanut suli neqerooruteqartitsivigineqanngitsunut missingersuutini iluarsaassimavaa ingerlatseqatigiiffiullu niuernermut aningaasalersuinermullu pilersaarutini nutartersimavaa.

Karl Frederik Danielsenip oqarnera naapertorlugu tamanna ’piffissaagallartillugu iliuuseqarneruvoq’. Ingerlatseqatigiiffiullu aningaasaqarnera suli peqqinnartumik ingerlanerarlugu.

Taamaakkaluartorli 900 millionit koruunit sumut pisariaqartinneqarnersut tamanut saqqummiunneqanngilaq.

Ataatsimiititaliap siulittaasua: Ineriartupoloorneq ernumanartoq

Politikerilli maanna Inatsisartuni Sanaartukkanut ataatsimiititaliamiissimasut aalajangiisussaagaluarunik immikkut ittumik atornissamut akuersisoqassanngikkaluarpoq.

Kalaallit Aiports Internationalip missingersuutaareersut saniatigut taama annertutigisumik pisariaqartitserpasinnera ernumanarluinnartoq ataatsimiititaliaq isumaqarpoq.

- Peqatigitillugu inaarutaasumik akigitinneqartussap suli ilisimaneqannginnera ajuusaarnartorujussuuvoq, Demokraatinit, Justus Hansen ataatsimiititaliami sapaatip akunnerani matumani marlunngornerup tungaanut siulittaasuusimasoq oqarpoq.

AAMMA ATUARUK Qaqortumi mittarfissamik suliariumannittussarsiorneq aallarteqqittoq

Tassuma ataatsimiititaliallu Naalakkersuisut mittarfinnik sanaartornermik aqutsinerat ’isornarluinnartuusoraat’ Naalakkersuisullu ’suliniutinik angisuunik suliaqarnerminni sukumiinerusumik ingerlatsinissaat’ kaammattuutigalugu.

Aningaasanik amerlanerusunik atornissamik kissaateqarneq Nuummi Ilulissanilu mittarfinnik sanaartornermut taamaallaat tunngapput, Qaqortumilu mittarfimmut tunngassuteqarnani.

Kalaallit Airports Internationalip pisortaaneranit, Jens Lauridsenimit ingerlatseqatigiiffiullu siulersuisuisa siulittaasuanit, Kjeld Zacho Jørgensenimit KNR-imut oqaaseqartitsiniarneq maannamut iluatsissimanngilaq.

Ingerlatseqatigiiffilli aningaasanik amigaateqaleriataanngitsoq oqartussaniilli piumasaqaat mittarfinnilu nakkutilliisoqarnerunissaa suliniutinut ilaatigut akisunerulersitsisut Jens Lauridsenip Sermitsiaq.AG-mut oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat