Tusagassiuut: USA Islandimi sakkutooqarfissuaq ammaqqinniarpaa
Amerikamiut illersornissamut ministereqarfiata Keflavikimi sakkutooqarfimmi timmisartunut inissiisarfiup pioreersup annertusaavigineqarnissaanut aappaagu aningaasaliisoqarnissaanik qinnuteqarsimasoq, Amerikami nutaarsiassaqartitsivik "Stars and Stripes", sakkutooqarnikkut pissutsinik sammisaqartup allaaseraa.
Ruslandip Issittumi suliaqarnerulernera pissutigalugu Keflavikimi sakkutooqarfiup matuneqarneranit ukiut qaangiuttut ammaqqinneqarnissaa kissaatigineqalerpoq.
Keflavikimi sakkutooqarfissuaq Reykjavikip kujataata-kitaatungaani kilometerinik 45-nik ungasitsigisumiittoq, USA-p 1951-imit 2006-imut ingerlappaa. Sakkutooqarfik Ruslandimut sorsunnerup nillertup nalaani pingaarutilittut atuuppoq.
Keflavikimi sakkutooqarfimmi amerikamiut sakkutuui taamani 2500-iupput, taakkulu sakkutuut imarsiortut timmisartartullu timmisartui sorsuutaat, timmisartut orsussamik pilersuisut aammalu qulimiguullit annaassiniartartut sullitaraat.
Stars and Stripesip tusarfii naapertorlugit sakkutooqarnikkut annertusaanissamut Rusland maanna aamma pissutaavoq. Russit aqqartartuisa pitsaanerusumik nakkutigisinnaanissaat siunertaasoq sakkutuuni atorfilittaq kinaassutsiminik isertuussisoq ilisimatitsivoq.
USA-p illersornissamut ministeriata tullersortaata Bob Workip Islandimut septembarip qaammataani tikeraarnerani Keflavikimi sakkutooqarfiup eqqartorneqarsimanera Reykjavikimi oqartussaasut Islandimi tusagassiorfinnut siornatigut uppernarsarsimavaat.
