Tusagassiuut: Royal Arctic Linep umiarsuit sanaartortitani marluk tuniniarpai

Royal Arctic Linep umiarsuit akunnattumik angissusillit marluk tuniniarniarlugit aalajangersimavoq - naak umiarsuit taakku suli nunatsinni sinersortinneqalinngitsut. Nittartagaq Søfart.dk taama allaaserisaqarpoq.
RAL-ip umiarsuit Remontowami sanaartortitaata aappaa tassaatinneqarpoq 'Jonathan Arctica'. Assi © : Jacob Strøm/RAL
Allattoq Simon Uldum -
aggustip 19-at 2016 10:23

Royal Arctic Linep Polenimi umiarsualiorfimmi Remontowami umiarsuarnik containerilersuutinik sanaartortitaminit tallimaasunit marluk tuniniarpai.

Søfart.dk-lu naapertorlugu umiarsuit tuniniarneqartut aappaat tassaavoq 'Jonathan Arctica', umiarsuillu pineqartut arlaata pisoqalisoq Pajuttaat, 1979-imi sanaajusoq, taarsertussaagaluarpaa.

Aamma atuaruk Tusagassiuut: RAL-ip umiarsuarsiassani marluk pisiariniarunnaaginnarai

- Umiarsuit taakku marluk tuniniarneqarnerat uppernarsarsinnaavarput. Umiarsualiorfiup isumaqatigiinniarfigineqarneranut annertuumut, sulilu ingerlanneqartumut, atatillugu tamanna pivoq. Oqaloqatigiinnerit pitsaasumik kingunissalimmillu ingerlanneqarput, suliarli taanna maannakkuugallartoq oqaaseqarfigeqqissinnaanngikkallarparput. Aamma siunissami pilersaarutinut qanoq sunniuteqassanersoq oqaaseqarfigisinnaanngikkallarparput, Royal Arctic Linemi pisortaaneq, Verner Hammeken, Søfart.dk-mut taama oqarpoq.

Aamma atuaruk ASSIT RAL-ip umiarsuartaassaasa tallimaasut ilaat ataaseq Polenimi singinneqarpoq

Royal Arctic Linep Polenimi umiarsualiorfik umiarsuarnik immikkut ittunik tallimanik sanaartortitsinissamik maajip 31-iani 2013-imi isumaqatigiissuteqarfigaa. Umiarsuaq containerilersuut angisooq - Malik Arctica - Mary Arcticap maanna Nuup Aalborgillu akornanni assartuussisup assinga ineriartorteqqinneqarsimasorlu, kiisalu umiarsuit nunaqarfinnut pajuttuisussat sisamat.

Umiarsuit containerilersuutit mikinerit aappaat, Ivalo Arctica, marsip 23-ani umiarsuaatileqatigiiffimmut tunniunneqarpoq, teknikkikklli akornuteqarmat Gdanskimi umiarsualiorfimmut utertinneqartariaqarsimavoq.