Tusagassiuisarnermi akisussaassuseqarneq pillugu inatsit
Nunatsinni innuttaasutut tusagassiorfinnit narrunarsarneqartutut aamma naapertuilluanngitsumik pineqartutut misigisimaguit kia tamanna akisussaaffigissavaa?
Aamma tusagassiorfiit killeqanngitsumik tusagassiisinnaatitaappat?
Apeqqutit tamakkua ilungersunartut Naalakkersuisunit maanna nunatsinni nutaamik tusagassiuisarnermi inatsisiliornikkut akiniarsarineqarput.
Nunatsinni tusagassiisarneq pillugu inatsiseqareeraluarpoq, tassanili danskit inatsisaat tunngavigineqarluni.
Taamaattumik Naalakkersuisut isumaqarput tusagassiuisarnermi akisussaassuseqarneq pillugu nunatsinnut naleqquttumik inatsiseqartariaqartugut.
- Siunnersuummi aalajangersarneqarpoq innuttaasut tusagassiorfinnit narrunarsarneqarpata kina akisussaassuussanersoq aamma qulakkeerneqassaaq tusagassiorfimmut kina akisussaasuunersoq, naalakkersuisunut ilaasortaq Tommy Marø ualeq manna Inatsisartuni inatsisissatut siunnersuut saqqummiukkamiuk taama oqarpoq.
Partit tamarmik inuit imminnut ilisarisimaqatigiinnerannik ataqqinnittumik nunatsinni immikkut tusagassiuisarnermi akisussaassuseqarneq pillugu inatsiseqalernissaa isumaqatigaat.
- Maani inooriaaserput immikkut ittuuvoq danskillu inooriaasiannit allaanerulluni. Innuttaasut siamaseqalutik amerlanngitsukkuutaarlutik inuupput taamalu imminnut ilisarisimalluinnarlutik. Taamaattumik sumiiffinni ataasiakkaani narrunarsaataasinnaasut eqqumaffigineqartariaqarput, taama oqarpoq Ruth Heilmann, Siumut.
Nunatsinni tusagassiinermut tunngasunik aalajangiisartut aalajangertassavaat tusagassiinermi ileqqorissaarnissaq unioqqutinneqarsimanersoq. Ataatsimiititaliaq ullumikkut inatsisilerituunik marlunnik siulittaasoqarlunilu siulittaasup tulleqarpoq. Inatsisissatut siunnersuummi Naalakkersuisut siunnersuutigaat ataasiinnarmik siulittaasoqassasoq taannalu inatsisilerituujusariaqanngitsoq, kisiannili Nunatsinnut tusagassiuutinullu ilisimaarinnittuussasoq.
