Tusagassiuisarnermi akisussaassuseqarneq Inatsisartuni ullumi sammineqarpoq
Tusagassiuisarnermi akisussaassuseqarneq pillugu Inatsisartut inatsisissatut siunnersuutaat aappassaaneerlugu oqallisigineqareerluni, ataatsimik amerlanerussuteqartumik akuerineqaraluartoq, pingajussaaneerneqannginnerani Kultureqarnermut ilinniartitaanermullu ataatsimiititaliami suliareqqinneqassaasoq siunniunneqarpoq.
Inatsisissap pingajussaaneeqqinnissaanut kissaateqarlutik amerlanerussuteqaqqatartut 14-iinnaapput, akerliusullu 13-iullutik, taamaasilluni inatsisissatut siunnersuut ataatsimiititaliami suliareqqinneqaqqaassaaq.
Tusagassiutit pillugit aalajangiisartut katitigaanerat inatsisissami ilaatigut eqqartorneqarpoq, siulittaasup inatsisilerituujunissaa qulakkeerneqassasoq, Ataatsimiititaliamit tassani inassutigineqarmat. Aamma Tusagassiutit pillugit aalajangiisartut tusagassiortunik inuttarititai arlaannaannulluunniit attuumassuteqannginnissaat qulakkeerniarlugu affaannanngortinneqassasut Ataatsimiititaliap innersuussutigaa, tamannali Naalakkersuisunit isumaqatigineqanngilaq.
Inatsisissatut siunnersuummut tusarniakkat ilaat, Danmarkimi inatsisilerinermut Ministeriaqarfiup apeqqutinut suli akissuteqarsimannginnera, pingajussaaneerinnittoqannginneranut ataatsimiititaliamit tusaaniarneqarnissaat piumasarineqarpoq.
