Tusagassiortut tusaasassaat ikinnerulissapput
Naalakkersuisut siulittaasuata Hans Enoksenip allaffiata silataani torsuusaq matuneqalerpoq.
Sanasut ulluni makkunani torsuusap qeqqata nalaani nutaamik matulersuipput.
Igalaartalimmik matuliisoqarnerata kingunerisaanik tusagassiortut naalakkersuisuni ilaasortat ataatsimiittarfianniit allornernik 14-inik ungasinnerusumiittalissapput.
Naatsumik oqaatigalugu tusagassiortut matup silataanut inissinneqarput.
Igalaartalimmik matuliinissamik isumassarsisuuvoq Namminersornerullutik Oqartussani pisortaaneq Kaj Kleist.
- Matuliisoqarnissannik isumassarsiaq ukiut marluk matuma siornatigulli isumassarsiarineqarpoq. Taamanikkut naalakkersuisuni ilaasortat tusagassiortunik tusaasoqaratik isertuussassanik eqqissillutik oqaloqatigiissinnaannginertik naammagittaalliuutimmassuk, Kaj Kleist oqarpoq.
Uiguleriinnik matuliineq sapaatip akunneri pingasut matuma siorna aallartippoq 53.000 koruuninillu akeqarluni.
