Tusagassiortut KNR-imi pisortanilu atorfillit tallimanngorpamiit suliumajunnaarsinnaapput
Tusagassiortut kattuffiata, Dansk Journalistforbundip, Namminersornerullutillu Oqartussat akissaatit pillugit isumaqatigiinniarneri iluatsinngippata. Isumaqatigiinniarnerit qaammatini arlalinni uninngareerlutik ullumi aallarteqqipput.
Pisortani tusagassiortut tusagasiisartullu 45-t missaanniittut sinnerlugit Dansk Journalistforbund isumaqatigiinniartuuvoq, isumaqatigiinniarnerillu angusaqarfiussanngippata suliumajunnaarnissaq tallimanngornermut ilimasaarutigineqareerpoq.
Suliumajunnaartoqassagaluarpat taamaalisoqartillugu nutaarsiassanik aallakaatitsineq pillugu isumaqatigiissut atuutilissaaq. Isumaqatigiissut 1985-meersoq naapertorlugu KNR nutaarsiassanik naatsunik ullormut arlaleriarluni aallakaatitsisassasoq, KNR-ip pisortaa Lars Lennert-Sandgreen ilisimatitsivoq.