Tusagassiortut pingasut ullumi DK-mi eqqartuussivinni sammineqassapput
Tusagasssiortoq savilerluni mittarfimmiissimanera pillugu Danmark-imi eqqartuussivimmi Højesteret-imi ullumi eqqartuussissutigineqassaaq. Eqqartuussivimmi allami Østre Landsrette-imi tusagassiortut marluk eqqartuussivimmi sassartinneqassapput, taakkua atitik allanngortillugit pas-imik biilernermullu uppernarsaatinik qinnuteqarsimapput, pisortat pas-inik biilernermullu uppernarsaatinik nakkutiginnilluannginnerat uppernarsiniarlugit.
Tusagassiortoq savilerluni mittarfiimmissimanera pillugu qanoq sunalu atorlugu eqqartuunneqassanersoq pissanngatigineqarpoq, siunissami taamatut ittumik pineqatissiisarnernut atorneqartartussaammat, eqqartuussivik Højesteret aalajangiissutaasussamik pineqaatissiissaaq.
Eqqartuussiviit Københavns Byret aamma Østre Landsret isumaqarput, tusagassiortoq Urban-imeersoq 3.000 koruuninik akiliisinneqarluni pineqaatissinneqassasoq, tassani sakkut atorlugit inatsit pineqaatissiinernut atorneqartartoq malillugu. illersuisuiatali piumasarisimallugu eqqartuussiviit qullersaat tikillugu ingerlanneqassasoq.
Tusagassiortoq mittarfimmi nerianiartarfimmi savimmik tiguseriarluni timmisartunut ikiartorsimavoq ajornaquteqanngitsumillu savik nassarlugu timmisartumut ikisimasinnaalluni. Tusagassiortup taassumap illersuisuiata Advokat Tyge Trier-ip uppernarsarniarpaa timmisartoqarfimmi isumannaallisaanermi sulinerup amigaateqarnera.
Tusagassiortut kattuffiata siulittaasuata Mogens Blicher Bjerregård siornatigut oqarsimavoq pisoq malinnaaviginiarlugu kiffaanngissuseqarluni tusagassioriaaseq eqqarsaatigalugu.
Eqqartuussivimmi Østre Landsrette-mi ullumi suliarineqassapput aviisimi Ekstra Bladet-mi tusagassiortut marluk atitik allanngortillugit pas-imik biilinillu aqutsisinnaanermik uppernarsaammik pissarsisimasut.
