Tusagassiortut Peqatigiiffiat: Aaqqissuisunngortussap isumai akuerineqarsinnaanngillat

aggustip 16-at 2005 07:34

Akuerineqarsinnaanngilaq radioavisimi aaqqissuisunngortussaq Johannes Mathiassen-i isumaqarmat aviisini tusagassiortut politikerit malersoraat.

Taama oqarpoq Tusagassiortut Peqatigiiffianni siulittaasoq Jesper Hansen, aaqqissuisunngortussap AG-mi ullumi saqqummersumi aviisit pisuutimmagit politikerinut malersuinerarlugit – pingaartumillu Siumukkormiunut.

Johannes Mathiassen ullumikkut Siumumi allattaavoq ukiallu ingerlanerani atorfittaaminut inissittussaalluni. Jesper Hansen-ip tupigusuutigaa partiimi atorfilittap taamak isumaqarnera.

-Tusagassiuutit pisuussutiginngilaat politikerit pissusilersornerisa tusagassiutit malinnaaffigineqalertarmatigit, Jesper Hansen oqarpoq. Taassuma takorloorsinnaanngilaa partiimi allattup suliffittaamini isuma taanna pigiinnarumaaraa.

-Tusagassiuutit politikerit iliuusaannut malinnaajuassapput. Tusagassiortut suliaminnik paaqqinninnerat avoqqaarisinnaanngilarput, siulittaasoq isumaqarpoq.

Johannes Mathiassen AG-mi ullumi saqqummersumi oqarpoq, ullumikkut tusagassioriaaseq kusananngilluinnartoq. Tassani aaqqissuisunngortussap eqqarsaatigalugu naalakkersuisuusimasup Jens Napaattuup ilassinninnermut atugassat sipporlugit atuisimanera.

-Nakkutilliisussat suliaminnik sumiginnaasimapput, Johannes Mathiassen AG-mut oqarpoq. Isumaqarporlu atorfilittat kontomut kukkusumik inissititerisimasut. Aamma Johannes Mathiassen-ip apeqquserpaa Napaattooq unioqqutitsilluni iliuuseqarsimanersoq.