Tusagassiortut oqaatsitigut piginnaasaat Inatsisartut oqallisigileraat
Mimi Karlsenip siunnersuutigaa, kalaallit oqaasiisa atorneqarnerisa ineriartortinneqarnerisalu nukittorsarneqarnissaannut, Ilisimatusarfimmi Tusagassiornermik Bacheloritut ilinniarsimasut oqaatsitigut piginnaasaasa qaffatsinnissaanik qulakkeerinnissaq.
- Kalaallisut oqaatsivut nunatsinni oqaatsini atorneqartuni pingaarnersaapput. Taamaattumillu pisussaaffigivarput oqaatsitta atorluarneratigut naapertuuttumik atorneqarnissaa anguniartuassallutigu. Atorluaannikkut aamma oqaatsitta uummaarissuulluni ineriartortuarnissaa aqqutissiuusseqataaffigissavarput, Mimi Karlsen siunnersuuteqarluni ilaatigut taama tunngavilersuivoq.
Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen isumaqarpoq,
Naalakkersuisut ilinniarfinnik ingerlaavartumik attaveqateqarnermikkut ilinniarfinni tamani Nunatsinni ingerlanneqartuni oqaatsit pingaaruteqartutut inissisimatinneqarnissaat qulakkeerniaraat, soorunami aamma Tusagassiornermut Ilinniarfimmi.
Naalakkersuisut inassutigaat siunnersuut itigartinneqassasoq, sulianut akuleruttussaannginnernut tunngavik peqqutigalugu siunnersuut piviusunngortinneqarsinnaanngimmat, taamaattoq oqaatigineqareersutut Naalakkersuisut siunnersuutigineqartup siunertaa anguniarniarpaat inatsimmi periarfissiissutaareersut aqqutigalugit, Naalakkersuisoq Nivi Olsen siunnersuutigineqartumut akissuteqarluni taama allappoq.