Tusagassiortut Naalakkersuisumut isornartorsiuipput
Isornartorsiuinermut peqqutaavoq naalakkersuisunut ilaasortap 2010-mi aningaasanut inatsisissaq tusagassiortunut saqqummiunniarlugu qaaqqusigami, tusagassiortut aalajangersimasuinnaat qaaqqusimammagit.
Naalakkersuinermik suliallit tusagassiortunik katersortitsiniarnerminni tusagassiortut aalajangersimasuinnaat qaaqqusassappatigit Tusagassiortut Peqatigiiffiata killiligaanani oqaaseqarsinnaanermik killilersuinerunerarpaa. - Nuannarinerusatik kisiisa qaaqqusarniarpaat, tusagassiortut peqatigiiffianni siulittaasoq Mariia Simonsen Atuagalliutinut oqarpoq.
Palle Christiansenilli iliuuserisani isornartoqannginnerarpaa.
- Aningaasanut inatsit pingaaruteqaqisoq saqqummiunniarakku aningaasaqarnermik paasinnissinnaasunik tusarnaartoqarnissara pingaaruteqarpoq. Taamaammat tusagassiortut inuutissarsiutinik aningaasarsiornermillu sammisaqartareersimasut qaaqquakka, Palle Christiansen Atuagalliutinut oqarpoq nangillunilu oqaatigalugu siunissami qularnanngitsumik taamaalioqqikkumaarluni.
- Taamaaliortariaqanngilaq, taamatummi atugassaqarluta peqataaffiginianngilarput. Imminut ikinngutiminullu taava saqqummiussiinnartariaqartassaaq, Mariia Simonsen oqaaseqarpoq.
Maani radioaviisimi tusagassiortut katersortinneqarneranni aalajangersimalluinnartunik maleruagassaqarpugut. Tusagassiortut ilanngutassiornissamik pisussaaffeqartut kikkut tusagassiortunik katersortitsinermukartinneqassanersut aaqqissuisutut aqutsisut toqqartarpaat.