Tusagassiortut kalaallisut ilinniaqqittariaqarput
Oqaatsinik ilisimatusartoq Arnaq Grove ippassigami uparuaavoq, tusagassiuutini kalaallit oqaasiinik atuineq ima ajortigilersimasoq, allaat paatsuuinermik kinguneqartalersimalluni. Taama oqarnera Carl Christian Olsenip isumaqatigaa.
Eskimologip Arnaq Grovep, ilisimatusaatigalugu kalaallit oqaasiisa tusagassiuutini atorneqarnerat misissuiffigileruttorpaa, misissuinermini paasivaa, pissutsit ima ajortigilersut allaat tamanna inuinnaat naalakkersueqataanerannut ajornartorsiutaalersimalluni. Allaaserisat aviisiniittut qarasaasianiittullu qallunaatuumiit nutsikkat pingaartumik kalaallisuinnaq oqaluttunut paasissaanngitsut amerlavallaarnerarpai. Taama oqarnera Oqaasileriffiup pisortaata Carl Christian Olsenip isumaqatigaa:
- Nassuerutigisariaqarpoq ilaanni nutsikkat oqariartuutit apukkumasaralui ilaanni paasineqanngitsoortarmata, tassalu kialuunniit innuttaasup pisinnaatitaaffigaa erseqqissumik paasitinneqassalluni. Tassuuna suliassap ilagaa aamma paatsuungananngitsumik oqalunnissaq aammalu sapinngisamik akuerisat atorlugit oqaatsinik atuinissaq, taanna tungaalitsitertariaqarsoraara.
Assersuutigaa qallunaatut oqartarneq "at lægge kortene på bordet".
- Ilaatigut oqaatsit namminneq pulajartuaartarput, soorlu 'isumaqatigiinniutit nerriviup qaanut qaqinneqareerput', assigisaalu, oqaatsit nutsikkat isumaliortaaseq qallunaatut ingerlassaq atorlugu oqalunneq, oqarpoq.
Taamaattumik Tusagassiornermut Ilinniarfiup aaqqissugaanik tusagassiortut kalaallit oqaasiinik pikkorissartinneqartalissasut, Oqaasileriffiup pisortaata siunnersuutigaa.
- Tusagassiortutut suliartik pimoorullugu ilumoorukkunikku isumaqarpunga isummerfigisariaqaraat, massakkut inatsisisiliornermi kalaallit oqaasii pisortatigoortumik oqaasiummata. Qanoq ilillugit tusagassiortuusut sulinerminni qanoq iliuuseqassanerlutik eqqarsaatigissavaat. Tassani peqatigiiffiata periarfissarai ilaasortani tamakkunatigut ilinniaqqinnissamut periarfississallugit, aamma Tusagassiornermut Institutti periarfissaqarpoq kalaallinik taamatut ilinniartitseqqissinnaalluni, Carl Christian Olsen oqarpoq.
Tusagassiornermut Ilinniarfimmi tusagassiortunik ilinniartitseqqinnittarnissat aningaasaliiffigineqarnikuunngimmata isumagisinnaanagit, pisortaq Naja Paulsen oqarpoq, namminneq tusagassiortunngorniat bachelorinngornissaat pingaarnertut isumagisassarigamikku.
