Sverigimi assammik arsartartut EM-erneranni norskit tusagassiortuisa danskit assammik arsartartuilu aaqqiaanngissuteqarnertik pillugu akunnittarfitsik allanngortippaat.
Danskit unammisartuisa akunnittarfimmi Helsingborgimiittumi Clarion Grand Hotelimi paarlersuarmut juullimut alersersuarnik nivinngaasimanerat aviisip Dagbladep soqutiginartoqartimmagu aaqqiagiinngilerput.
Danmarkip Norgellu EM-imi sapaammi unamminngilaarneranni norskit aviisiata juullimut alersersuit saqqummersimmatigit danskit unammisartui kanngusaarneqartutut misigisimapput,
Danskit nunanut allanut unammisartuisa attaveqaqatigiinnermut akisussaasuata Alexander Elverlundip pisoq tupannarnerarpaa.
- Pisimasoq qissaarnaqaaq, Elverlund VG-mut oqarpoq.
- Akunnittarfimmi allanut matoqqasumik inuuneqarusuppugut, taamaammat Dagbladip oqaluttuaq saqqummersimmagu taama qisuariarpugut.
- Qungujunnartutut isumaqarput. Tamanna isumaqatiginnginnatsigu akunnittarfimmut saaffiginnippugut EHF-imiillu (Europami assammik arsartartut kattuffiat, aaqq.) aamma oqaloqateqarluta.
- Unammersuaarnerni nammineq pigisagut isumannaatsumiittut misigimasussaavugut, Elverlund oqarpoq.
Dagbladimit tusagassiortut danskit unammisartuisa akunnittarfigisaat maanna qimassimalerpaat TV2-ilu aamma taamaaliorsimavoq. VG naapertorlugu, norskit tusagassiortui akunnittarfimmut tikilluaqqusaasutut misigisimajunnaarsimapput.
Danskit EM-ertuisa norskit tusagassiortuisa aninissaat piumasarisimanagu Alexander Elverlund VG-imut oqarpoq.
Danmarkip Norgellu EM-imi unammineranni norskit 22-20-imik ajugaapput.
/ritzau/
