Tusagassiortunut siorasaarisarneq Tusagassiortut Peqatigiffiata misissulerpaat

Nunatsinni tusagassiortut arlallit qineqqusaarnerup kingulliup nalaani akerartorneqartarput saassunneqartarlutilluunniit. Taamaammat Tusagassiortut Peqatigiiffiata Nunatsinni tusagassiornermik suliaqartut 100-t ilaasortaaffigisaata, tusagassiortut atugarisaat misissortinnialerpaat.
Allattoq Jens Thorin
oktobarip 16-at 2009 14:24

- Pingaartumik qinersinerit nalaani allatigullu inuit ataasiakkaat iliuuserisimasaaannik qulaajaanerit nalaanni, qaqugukkulluunnit nuanniitsumik misigitinneqartarnertik pillugu ilaasortatsinnit saaffigineqartarpugut, Tusagassiortut Peqatigiiffiata siulittaasua, Mariia Simonsen, oqarpoq.

Taassumali erseqqissarpaa, imaanngimmat tusagassiortunik ullut tamaasa malersuisoqartartoq. Aamma erseqissarpaa, naalakkersuinermik suliallit tamarmik tusagassiortunik malersuineq ajormata. Isumaqarporli, inuit ilaat naalakkersuinermik suliaqaleraangamik killissartik puigortaraat.

- Qanorluunnit iliorsinnaalluni isumaqartoqartarpoq. Pissaanermik atornerluinissaq qanippallaalaarpoq. Pissaaneqarnerli akerlianik maniguunnermik eqqarsarluarnermillu kinguneqartariaqarpoq. Tusagassiortut siulittaasuat isumaqarpoq.

Tassalu Tusagassiortut Peqatigiiffiata ilaasortaasa 100-sut akornanni sulinermi atukkat pillugit misissuisitsinissaq siulersuisut aalajangiutereerpaat.

- Sulinermi taamatut atugassaqartitaalluni nuannertuaannangilaq. Paaserusupparput, malersuisarneq qanoq ajornartorsiutaatiginersoq, tusagassiortut qanoq misigisaqartarnersut, aamma tusagassiortunngorusuttut taama ikitsigisarnerannut tamakku pissutaasarnersut, Mariia Simonsen oqarpoq.

Taassuma neriuutigaa, misissuineq, Danmarkimi tusagassiortut kattuffiat peqatigalugu ingerlanneqartussaq, illuanut saannerani naammassineqassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq