Tusagassiortunik katersortitsinerit ataasinngornermi marluk: Nunatta ammaqqikkiartuaarnissaa pillugu pilersaarutit Kim Kielsenip saqqummiutissavai
Tusagassiortunik siullermik nalunaaqutaq qulingiluanut katersortitsisoqassaaq, partiilu siulittaasui tassani peqataassallutik.
Nunatta ammaqqikkiartuaarneqarnissaa naalakkersuisut siulittaasuata Kim Kielsenip tusagassiortunik nalunaaqutaq qulingiluanut saqqummiutissavaa.
Coronap ajornartorsiortitsineranut atatillugu killilersuilernerit kingorna nunarput qanoq ammaqqikkiartuaarneqarniarnersoq tassani saqqummiunneqassaaq.
Kim Kielsenip partiit siulittaasui tamarmik tallimanngormat ataatsimeeqatiserai, nunatta ammaqqikkiartuaarneqarnissaanut pilersaarutit tassani oqaluuserineqarlutik.
Coronavirusimik tunillatsissimasoq nutaaq pillugu tusagassiortunik katersortitsineq
Tusagassiortunik nalunaaqutaq aqqanermut qiteqquppat taava aamma katersortitsisoqassaaq.
Coronavirusimik tunillatsissimasoq nutaaq pillugu tassani saqqummiussisoqassaaq.
Aasianni innuttaasut ilaat tunillatsissimasoq pillugu naalakkersuisut siulittaasuat Kim Kielsen nunattalu nakorsaanera Henrik L. Hansen saqqummiussisuussapput.
AAMMA ATUARUK Coronavirusimik tunillatsissimasumik Aasianni nassaartoqartoq
Aasiammiu Danmarkimit utereerluni misissortissimavoq Covid-19-imillu tunillatsissimasoq tassani paasineqarluni.
Tunillatsissimasutut nassaarineqartoq marsimili siulliuvoq, Nuullu avataani aamma siulliulluni.
Tusagassiortunik katersortitsinerit tamarmik KNR TV-kkut, KNR-radiokkut knr.gl-ikkullu toqqaannartumik aallakaatinneqassapput.