Tusagassiortoq toqutaavoq
Afghanistanimi Talebanit ippassaq saassussinerisigut inuit arfineq-marluk toqunneqarmata, toqutaasut ilagaat Norgimiu aviisiliortoq 38-inik ukiulik.
Carsten Thomassen Norgimiut aviisianni Dagblademi sulisuusoq, Norgimiut nunanut allanut ministeriata illoqarfiit pingaarnersaanni Kabulimi hotelimi ataatsimeeqateqarnissaa tusagassiariniarlugu Afghanistanimiippoq.
Allattoq Mads Lynge
januaarip 15-at 2008 07:49
Talebanit pikitsitsiniat – naalakkersuisut sakkutuuisut atisalersorsimasut – hotelimut isaapput eqqaassilerlutillu qaartartumillu qaartitsillutik.
Aviisiliortup toqutaasup saniatigut Norgimiut nunanut allanut ministereqarfianni atorfilik allallu tallimat toqutaapput.
Qaartartumeerinermi Norgimiut nunanut allanut ministeriat toqoriarneqaraluarpoq, taassumalu pilersaarutit naapertorlugit nunap avannarpasinnerusortaanut ullumikkut tikeraarnissaagaluani taamaatiinnarpaa – taamaattorli Kabulimi qaartartumeerinerup Norgimiut Afghanistanimi suleqataanerat allanngortinngilaa.
Norgip ministeriunerata Jens Stoltenbergip Norgip Afghanistanimi sakkutooqartitsinera allatigullu suleqataanera allannguuteqassanngitsoq aalajangiusimavaa.
