Tusagassiortoq Marokkomi oqartussanit tigusaasoq

Danskeq tusagassiortoq Marokkomi oqartussaasunit tigusaaqqavoq. Inoqajuitsoq Killeq pillugu radiokkut aallakaatitassioreersorlu tusagassiortoq tigusarineqarpoq.
novembarip 30-at 2010 07:49

Aallakaatitassiami europamiut Marokkup sineriaani tiguagaaqqasumi aalisartarnerminnut 1 miiliardit koruuninik akiliisariaqartarnerat sammineqartoq, Danmarkip Radioata nittartagaani allaaserineqarpoq.

Pisimasuinnik aallakaatitassiortoq Mads Ellesøe, arfininngormat unnuakkut tigusaavoq, angutit sakkutuujunngitsutut atisallit Mads Ellesøe inooqataalu arnaq Marakkechimi akunnittarfimmi inaanni itersarmatigik.

- Passitsinnik arsaarpaatigut, oqarasuaatitsinni angallattakkani SIM-kortivut peerpaat, pigisavullu tamaasa qinerlerfigalugit assallugit, Mads Ellesøe Danmarkip Radioanut oqaluttuarpoq.

Marokkomi isumannaallisaanissamut ulorianartorsiortitsisimasutut Mads Ellesøe pinngitsaalillugu atsiortinneqarpoq, qarasaasiaanni assiliiviinilu atortut assigiinngitsut, soorlu eqqaamasaatinut ikkuffiit, harddiskit eqqaamasaatillu piiarneqarlutik.

Nalunaaquttap akunneri tallimat/-arfinillit qaangiummata Marokkomiit timmisartumik aallartinneqarput.

Aappariit tigummineqarallarnerminni timimikkut ajoquserneqanngillat.