Tusagassiorfippassuit aaqqissuisui Københavnimi

- Nalunngilara ilissi tusagassiorfiit pingaaruteqartorujussuarmik ajornakusoortumillu suliassaqartusi, statsminister Lars Løkke Rasmussen ataatsimiiffimmi operami oqarpoq.

Aamma Naalagaaffiit Peqatigiit generalsekretærerisimasaat Kofi Annan oqalugiartunut ilaasoq.

- Ilissi nunarsuarmi tusagassiorfiit ataqqineqarnerpaat sunniuteqarnerpaallu sinnerlugit maaniippusi, taamaammat nunarsuarmi politikkikkut siuttut inuiassuillu sapaatip-akunnerini tullerni sunnerniarnissaat pingaaruteqarluinnarpoq, Kofi Annan oqarpoq.

EU-kommissionip siluttaasua Jose Manuel Barruso isumaqataavoq.

- Silap pissusaa pillugu apuunniakkavut iluatsikkutsigit, taava Københavnimi ataatsimeersuarnissap iluatsinnissaa aamma qulakkeerneqarsinnaassaaq. Taamaammat suleqatigiilluta oqariartuutiginiakkatta siammarternissaat pingaaruteqartorujussuuvoq, Barruso oqarpoq.

Lars Løkke Rasmussenip oqaaseqarnermi, silap pissusaa pillugu isumaqatigiissutissap kigaaginarsinnaasumik isumaqatigiinniutigineqarnera aamma uparuarpaa, taamaakkaluartoq nunarsuarmi tusagassiorfiit nuimasut aaqqissuisuisa naapeqatigiinnerat pingaaruteqarluinnarnerarlugu.

- Inuit 300-it sinneqartut nunanit 120-ineersut naapinnerat immikkuullarissuuvoq. Pingaartumik eqqarsaatigalugu oqalugiartinneqartunut, tusagassiorfiit taama amerlatigisut tusarnaartorisinnaagamikkit, isumaqassaqaaq, aaqqissueqataasoq professor Niels Thygesen oqarpoq.

Nunat ineriartortitassat tusagassiorfiisa aamma aallartitaqarluarnerat pingaartuunerarpaa.

- Siunertarmi ataasiinnaavoq, tassa paaseqatigiilluni silap pissusaa pillugu Københavnimi decembarimi isumaqatigiittoqarnissaa, Niels Thygesen oqarpoq.

DR-ip ilanngutassiaa taamaalillugu kalaallisuunngortipparput.