Tusagassiorfik: Danmarkip Issittoq pillugu ataatsimoorussamik periusissiaqarniarnera naalagaaniarneruvoq

Issittoq pillugu periusissiaq nutaaq ukiunut qulinut atuuttussaq savalimmiormiut Danmarkimut ingerlateqqippaat.
Nunanut allanut tunngasunut naalakkersuisoq, Pele Broberg, Savalimmiuni nunanut allanut tunngasunut naalakkersuisoq Jenis av Rana, danskit nunanut allanut tunngasunut ministeriat amerikamiullu nunanut allanut ministeriat Issittumi siunnersoqatigiit ataatsimiinnissaat sioqqullugu maajimi naapipput. Assi © : Scanpix
Allattoq Anders Dall
juunip 14-at 2021 15:57

Issittoq pillugu Kalaallit Nunaata, Danmarkip Savalimmiullu akornanni ataatsimoorussamik periusissiaq Danmarkip suli kissaatigaa. Savalimmiormiut maanna taama oqarput.

Savalimmiormiummi nunanut allanut tunngasunut naalakkersuisuat Jenis av Rana Danmarkimi tusagassiorfimmut Altingetimut ima oqarpoq:

- Naalagaaffeqatigiit Issittoq pillugu ataatsimoorussamik periusissiaqarnissaat Danmarkip kissaatigaa. Tassanilu isumaqatigiinngittoqartariaqanngilaq.

AAMMA ATUARUK Issittumut periusissiaq pillugu politikikkut anneruniunnerit sivitsortut

Kalaallit Nunaat nunat allat peqatigalugit Issittumut perisissiornianngitsoq, nunanut allanut tunngasunut naalakkersuisup Pele Brobergip KNR-imit qanittukkut apersorneqarnermini oqaatigaa:

- Nunat allat peqatigalugit Issittumut periusiorniarsarinngilagut. Nunanuku taakku marluk uagut periusissioqatiginiaraatigut. Taamaammanuna oqartunga, taakku suniarnersut paasiniarukku taakku oqaloqatigissavatit, Pele Broberg KNR-imit qanittukkut apersorneqarluni oqarpoq.

Qiteqatigiit pingasut

Issittumi periusissiaq ukiunut qulinut atuuttussaq Kalaallit Nunaata, Danmarkip Savalimmiormiullu 2011-mi isumaqatigiissutigaat.

Issittoq eqqissisimaffiusoq isumannaatsorlu sulissutigineqassasoq taamanikkut atsioqatigiissutigineqarpoq, Issittumilu avatangiisit mianeralugit ineriartortitsisoqarnissaa aamma isumaqatigiissutigineqarluni.

Isumaqatigiissut taanna 2020-p naanerani atuukkunnaarpoq, nutaarlu suli isumaqatigiinniutigineqarluni:

- Tassa qiteqatigiinnissami inuit marluinnaat qiteqatigiittussanngillat inuit pingasut qiteqatigiinnissaat tunngaviusussaavoq, taanna pisinnaanersoq ataqatigiissumillu ingerlanneqarsinnaanersoq piffissaq takutikkumaarpaa, Múte Bourup Egede, KNR-imit qanittukkut apersorneqarluni oqarpoq.