Kalaallit Nunaata qaqqarsui elektronikkiliortartut pilerigeqisaannik aatsitassanik qaqutigoortunik nalitoorsuarnik toqqortaateqarput. Assi: Bluejay Mining

Tusagassiorfik: Aningaasaatilissuit Kalaallit Nunaanni aatsitassarsiornermut aningaasaliipput

Inuit nunarsuarmi pisuunerpaat arlalissuit nunatsinni aatsitassarsiornermut atugassanik aningaasaliipput.

Kalaallit Nunaanni aatsitassaqarnera nunarsuarmi aningaasaatilissuit arajutsisimanngilaat. 

Teknologimi sanaartornermut atugassanik aatsitassanik qaqutigoortunik nunarsuarmi annertunerpaamut nunatsinni ujaasinissamut aningaasaliisut ataatsimoorlutik aningaasaleerrassimasut, amerikamiut tusagassiorfiat CNN saqqummiivoq. 

CNN naapertorlugu pineqartut tassaapput Bill Gates, Michael Bloomberg, Jezz Bezosilu amerikamiut suliffeqarfiutaanut Kobold Metalsimut aningaasaliipput.  

AAMMA ATUARUK Naalakkersuisut Parisimi isumaqatigiissut pillugu siunnersuut ukiamut kinguartippaat

Suliffeqarfik ingerlatsiviusoq Bluejay Miningimik suleqateqarpoq maanna nunatsinni sumiiffinni sisamani ingerlataqartumik suleqateqarpoq, tassaasunik: Dundas, Disko-Nuussuaq, Kangerlussuaq aammalu Thunderstone.

Aatsitassanik qaqutigoortunik elektronikkiliorfissuit atugassaannik piiaasoqarnissaanut periarfissaqalernera silap allanngoriartorneranik peqquteqarpoq, tamannalu pitsaaquteqarlunilu ajoquteqarpoq, Bluejay Miningimi allaffissornikkut pisortaasoq Bo Møller Stensgaard CNN-imut oqarpoq.

AAMMA ATUARUK Aningaasaatilissuit aatsitassarsiutileqatigiiffiat nikkelimik misissuilluni aallartittoq

- Kalaallit Nunaanni silap allanngoriartornerata kingunerluutanut isiginnittuulluni ernumanartuuvoq. 

- Kisianni ataatsimut isigalugu, silap allanngoriartornerata Kalaallit Nunaanni aatsitassarsiorneq paasiniaanerillu oqinnerulersippai ajornannginnerulersillugillu.

Ilisimaneqanngilarli angutit pisoorsuit nunatsinni aatsitassanut qaqutigoortunut aningaasanik qanoq amerlatigisunik aningaasaliissuteqarsimanersut.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl