Tusagassiorfiit ileqqorissaarnerusariaqarput
AG'p saqqamini assitaliinermini kukkuluttornerujussua allaavoq, aamma allaavoq toqutsisimasup ukiukittup assinga saqqamini assitaliukkamiuk.
Toqutsisimasup aappaa pinerluttuliornermi nalaani 17-iinnarnik ukioqarpoq, taamatut pisoqartillugu tusagassiuutit mianersornissartik eqiigaffigeqqissaartariaqaraat Mariia Simonsen nassuiaavoq:
Tusagassiortut Peqatigiiffianni siulittaasoq Mariia Simonsen, Radioavisimut taama oqarpoq.
Pisoq aallartippoq Aasiammiut arnat inuusuttunnguit marluk angummik qanigisaminnik toqutsisimasutut pineqaatissinneqarmata. Niviarsissat toqutsisimasutut eqqartuussaasimasut AG'p tamanut takusassiariniarlugit aviisip saqqaanut assitaliunniarsimavai. Kukkuluttornikkulli aappaa kukkusumik assitalersimallugu, taamaalillugu pisuussuteqanngitsoq toqutsisimasutut saqqummiullugu.
Kukkuneq ajorluinnarpoq AG-iillu kukkunini utoqqatsissutigereerpaa. Aammali inuusuttup aappaa 18-it inorlugit ukioqarpoq. Ukiukitsut pineqartillugit mianersoqqissaartariaqartoq, Mariia Simonsen-ip uparuarpaa, oqarlunilu tusagassiornermi ileqqorissaarnissami malittarisassat sukateriffigineqartariaqartut.
Tusagassiisarnermi ileqqorissaarnissap sukateriffigineqarnissaanut AG-mi pisimasoq pissutaanngilaq, pilersaarutaareersimallunili.
Tusagassiorfinni ileqqorissaarnissaq pillugu eqqartuisarnissaq TP'p siulittaasuata Mariia Simonsen-ip kajumissaarutigaa.
-Neriuutigaara qanittukkut pisup tusagassiortut allatullu ilinniagallit eqqarsarluaqqaarlutik iliuuseqartarnissaannut uisissagai; tusagassiuutimmi immikkut akisussaaffeqarput. Inuilluunniit pinerluutitik pillugit eqqartuussaasimagaluarpata tamanut takusassiarinissaat mianersuussassaavoq.
