Tusagassiarineqarsimaneq kamaatigaat

Allattoq Najaaraq Egede
maajip 16-at 2007 10:57

Qallunaat sakkutuui 460-nik amerlassuseqartut, Irak-ip kujataaniitinneqartut, Basra-p eqqaani suli nakkutilliillutik angalaaqataartuarsinnarput naak kammalaatertik ataaseq ippassaq toqutaangaluartoq. DR-miit Jannik Kofoed Irak-imiit oqaluttuaraa, sakkutuut kammalaatertik toqutaasimasoq tusagassiutinit tusagassiarineqarsimanera kamaatigigaat.

Sakkutuut atorsinnaanngitsutut nalilerlugit tusagassiuutit naliliisarnerat qatsulluinnarparput, tupatsitaasimasutut susinnaajunnaaqqasutut uatsinnut isiginnitsitsisarmata.

Imaanngilaq sakkutuut misigissuseqanngitsut, sakkutuujuppulli suliaminnillu nangitsinissaminnik nukissaqarlutik, pisussaaffeqarput suliassiissutit nalakkersuisooqatigiit suliassiissutaat suliarissallugit.

- Qallunaat sakkutuuinut saassussisimanerup pilersaarusiorluagaasimanera pillugu, aammalu qallunaat sakkutuuinik Irak-imi innuttaasut qatsusilersmannginnersut; aperineqarami; sakkutuut oqaaseqartartuat akivoq;

Tamanna qanoq akissallugu nalunartorujussuuvoq, kisiannili qularutissaanngilaq inuit allat assigalugit Irak-imiut atuarfitaarusussasut, pitsaasunillu anartarfiit imikullu kuuffiinik aqqusersorneqarnissartik soqutigissagaat, nakorsiartarfiit il.il. aammalu inatsiseqarnissaq toqqissisimanissaq siunertaralugu, tassalu tamakkua qallunaat Irak-ip ilaani sulissutigalugit atuutilerseqqinniaraluarpaat.

Ilimagineqarpoq nunaqavissut sakkulersorsimasut ilaminut saassusiniarlutik taamatut iliorniarsimanissaat, aamma imaassinnaavoq ullualunnguit matuma siornatigut nunaqavissut ilaat pissaanilerujussuaq qallunaanit tigusarineqarnera pillugu sakkulersortoqarsimasoq,

Kikkut saassussisimasinnaanersut eqqoriaruminaappoq periarfissaasinnaasut arlaqarmata saassussisimaneq kikkut piliarineraat suli naluarput.