Tusagassaqartitsivinnut aningaasanik immikkut illuartitsisoqarnissaa Demokraatit siunnersuutigaat
Mediepulje 2010-mi 6 millionit koruuninik imaqassaaq, Kalaallillu Nunaanni illoqarfiit tamarmik, aviisinik print-on-demand-nngorlugit naqiterussutaasinnaasunik pisinissamut qinnuteqarsinnaanngussapput. Maskiina taamaattoq 300.000 koruunit missaanni akilerlugu pisiarineqarsinnaavoq. Aningaasanut inatsisissaq novembarip ulluisa sisamaanni aappassaaneerneqarpat, Demokraatit tamanna siunnersuutigissamaarpaat.
- Siumut isigaluni ineriartortitseqqinnissanut tapersiinissaq aningaasaliissuteqarnerup siunertaraa. Mediepulje ingerlatsinermut tapiissutitut atorneqassanngilaq - nassiussuinermiluunniit tapiissutitut. Demokraatit sinnerlugit inatsisartunut ilaasortaq Niels Thomsen taama allappoq.
Nunaqarfiit tunngaviusumik print-on-demand maskiinamik pisinissaminnut tapiiffigineqarsinnaassanngillat, inukippallaarnerat pissutigalugu pissarsinissaq akisuallaarluni akilersinnaanavianngimmat. Paarlattuanik illoqarfiit qaninnersaanni nunaqarfiit aviisinik aalajangersimasumik amerlassusilinnik inniminniisinnaapput. Taamatut periuseqarnerup ullumimut naleqqiullugu aviisinik nutaanik nunaqarfinni pissarsisarnissaq qulakkiissagaa Demokraatit isumaqarput.
