Tusaatissatut tigussavarput
- Apeqqut kalaallinut attuumassuteqarluinnarpoq, aatsitassanummi tunngassuteqartut Kalaallit Nunaannut angerlaanneqareerput. Taamammat aatsitassanut atatillugu qanoq iliortoqarnissaa kalaallit namminneq aalajangertussaavaat - qinngornerit ulorianartut eqqarsaatigalugit uranimut naaggaarluinnarnissaq ilanngullugu, Helle Thorning Schmidt oqarpoq.
Taassumali ilutigalugu aamma erseqqissaatigaa aatsitassat qinngornernik ulorianartortaqarsinnaasut avammut nioqqutigineqalerpata, naalagaaffeqatigiit akornanni tamanna oqaluuserineqartariaqassasoq, taamaalilluni Danmark oqaloqatigineqartariaqassalluni.
- Uranimik aatsitassanilluunniit allanik qinngornernik ulorianartortalinnik nioqquteqaraanni, nunanut allanut- isumannaallisaanerlu eqqarsaatigisassarujussuupput, aalajangersakkallu arlallit malittariaqarlutik.
Kalaalit Nunaanni aatsitassarsiornissap ineriartortinneqarnera Danmark qanimut suleqatigalugu pisariaqartoq, Aleqa Hammondip aamma erseqqissaatigaa.
- Uranimut naaggarluinnarneq atorunnaarsikkutsigu, taava imaanngilaq uranimik aappaagu piiaasoqalissasoq, inatsisilionrkkuli sulineq aallartissaaq, tamannalu pissaaq peqqinnissamut avatangiisinullu politikkerput qissimigaarlugu aammalu Danmark qanimut suleqatigalugu, apeqqutit illersornissamut sillimaniarnermullu tunngasut aamma ilaatinneqassammata. Naalakkersuisut siulittasuat tusagassiortunik ministeriuneqarfimmi katersortitsinermi taama oqarpoq.
Aamma nunanut allanut tunngasut sillimaniarnerlu pillugit suleqatigiinneq pillugit miisissuineq, Naalakkersuisut siuliisa aallartitaat, ingerlaqqissasoq, ministeriunerup erseqqissarpaa. Kisianni siunnerfiup allannguallatsinneqarsinaasoq Aleqa Hammond isumaqarpoq.
- Arlalippassuit allanngortinneqarsinnaapput ilanngussuunneqarsinaallutillu. aamma takusinnaavara, aatsitassanut tunngasillugu oqallinnermi illersornissamut sillimaniarnermullu tunngasortaani qulequttat assigiinngitsut Nunatta Danmarkillu akornanni attaveqatigiinnermut tunngasut oqallisigeqqinneqarsinnaasut., Aleqa Hammond oqarpoq.
Ministeriunerup saniatigut Naalakkersuisut siulittaasuat aallartitanut 40-nut Kalaallit Nunaata Aallartitaqarfiani ullumi aamma ilisaritinneqarpoq. Aleqa Hammond Dronngimut Amalienborgimi aqagu oqaloqatiginnikkiartussaaq. Aleqa Hammondip siunnersuutaa naapertorlugu, Naalakkersuisunut siulittaasuat Danmarkimut angalaqqaaraangami Dronningimut ilisaritinneqartassaaq.
Martine Lind Krebs tusagassiortunik Ministeriunerup allaffiani ullumi katersortitsisoqarmat peqataavoq.
