VIDEO Filmiliaritittartup tusaamasap Kujataa Google Street Viewikkut nittarsaakkaa
Assiliissut trekkerimik taaguuteqartoq Google Mapsimilu sammivinnik tamanik takutitsisartoq atorlugu assiliisaqattaarneq siorna oktobarip qiteqqunnerani ingerlanneqarpoq, ilaatigut Igalikup Uunartullu eqqaanni, kiisalu aamma sermip iigartartup Kiattut Sermiata eqqaani. Suliniummi pisortaq Malik Milfeldt tusagassiorfinnut nalunaaruteqarluni taama ilisimatitsivoq.
Nikolaj Coster-Waldau nunarsuaq tamakkerlugu ilisarisimaneqarluarpoq, ilaatigut tv-kkut nangeqattaartuliami nuannarineqarluartumi Game of Thronemi Jaime Lannisteritut inuttaaffigisani pissutigalugu.
Kujataata alianaassusersua takutikkusukkaa
Filmiliaritittartup Googlemik nunatsinnilu suliffeqarfinnik arlalinnik suleqateqarluni Street Viewimut assiliisussanngornini atuagassiami Sulummi januaarimi/februaarimi saqqummersumi oqaluttuaraa:
- Kalaallit Nunaat nunaavoq tupinnaannartumik alianaassusilik periarfissarpassuaqartoq (…). Isumaqarpunga piujuaannartitsinissamik tunngaveqarluni takornariartitsineq Kalaallit Nunaanni inuussutissarsiutinngorsinnaasoq nalituupilussuaq. Google Street View atorlugu Kujataata alianaassusersua inuit takusinnaassavaat.
Silap pissusiata allanngoriartornera sammigaa
Allamilli aamma siunertaqarpoq. Nikolaj Coster-Waldaumi Naalagaaffiit Peqatigiit silap pissusia pillugu nunarsuarmi anguniakkanik 17-iusunik nittarsaasussatut siorna septembarip qaammataani toqqarneqarpoq, silap pissusiatalu allanngoriartornera videomi immikkut sammissallugu toqqarsimavaa.
Nunarsuarmi anguniakkani 17-iusuni piujuaannartitsinissamik tunngaveqarluni ineriartortitsinissamut 2030-p tungaanut isumassarsiortitsinissaq siunertarineqarpoq.
Googlep filmiliornermillu suliffeqarfiit Lonely Leappip CoCreators Filmsillu saniatigut Kujataani filmeeraliornermik suliniummi suliffeqarfiit ataqatigiissaarinermik sulisutigullu ikiuuttut tassaapput: Visit Greenland, Destination South Greenland, Asiaq aamma Air Greenland.
