Tusaaleraluarlutik suli pitsanngornerusinnaagaluartut

Meeqqat tusilartut tallimat Cochlear Implantimik ikkussivigitinnermikkut nunatsinni tusaasinnaalersinneqarput. Peqqinnissaqarfiulli sipaarniarneratigut siutimik illuinnaagut ikkussivigitipput, tamannalu uggornartoq oqallorissaasoq, Johanne Alaufesen oqarpoq.

Meeqqap tusaasaa aallaqqaammut aanngasittarpoq.

Cochlear Implantit sungiukkiartornerani nipigissiartulersarpoq. Siutillu tusaasaat sungiusarluartaraanni naggataagut nipit suulluunniit immikkoortinneqarsinnaanngortarput.

- Akisoorujussuuvoq taanna suliaritinneq. Napparsimmaveqarfiup isumagisussaavaa taamatut suliaritikkiartortitsineq. Ajoraluartumillu sipaarsimavaat siutit illugiillugit suliaritittarnissaat.

Akisuallaaqimmanngooq.

Oqallorissaasup assut tamanna uggoraa, pikkorissarnerminni paasigamikku illuatungaannaanik tusaaneq ajornartorsiutaasinnaasoq.

- Takorloorsinnaavarput siutitta illuatungaa milillugu, qanoq tusaasagut amigaateqartigissasut. Meeqqat kalaaliaqqat taamatut suliaritissimasut illuatungiinnaanik suliaritittarsimapput akisuallaaqimmanngooq sipaaramikku.

Nuup Kommuneani oqallorissaasoq Johanne Alaufesen oqarpoq, Danmarkimi suliaritittartut siutaat tamarmik illugiinnik tusaasaqarniassammata suliarineqartartut.

Meeqqat sisamat angajoqqaatik, ilaquttatik oqartussanilu atorfillit arlallit meeqqat tusaasaqalersimasut qanoq ilinniartinneqarnissaannik marlunngornermiit sisamanngorneq ilanngullugu (4.-6. decembari 2007) pikkorissartinneqarput.

Meeqqat tusaasaqanngivinnerminngaanniit tusaasut akornanni inuunermut ikaarsaariartuaarnermi, sutigut tamatigut ikiorserneqartariaqarput. Tusilartutummi inuugallarnerminni kiserliorlutik inuusinnaasaramik, Johanne Alaufesen oqarpoq.

- Kiserliorlutik inuusinnaasarput immikkooruteqaramik. Tusaasaqalertitaalersimagaangamik suliaritereernermik kingornagut inuiaqatigiinnut akuunerulernissamut periarfissinneqartarput taavalu aamma oqaaseqalertarlutik, nassuiaavoq.

Suliaritinnikuunngitsut immaqa ussersornerinnaq atoraluarlugu oqaatsit ilinnialertarpaat aamma nipi suunersoq paasisarlugu.

- Paasisarpaat: Aap, matu matorlukkaangat ima nipeqarpoq, tiitorfik nakkaagukku ima nipeqarpoq, imaq kuutsikkukku ima nipeqarpoq, siornatigut tamakku tusaasinnaanngikkaluarlugit.

Peqqinnissamut pisortaqarfimminngaanniit oqaaseqartitsiniaratta iluatsitsinngilagut. Tusarusussimagaluarparput, illuttut tusaasaqarnerup pingaassusia eqqarsaatigalugu sooq meeqqat tusilartut siutaasa illuata aamma tusartaatilernissaa sipaarniarfigineraat.

Illuanik tusartaatilersinneq 300.000 koruunit missaannik akeqarpoq.