TUPILAKOSAURUS Nuummi tallimanngorpat saqqummersinneqalissaaq
Pia Ark'ep assilialiai nunasiaataasimanerup oqaluttuassartaanik, immikkut inuiaassutsimik eqqumiitsuliortuunerullu allaanerusumik illuatungileerpaluttumillu ingerlaneranik imaqarpoq. Assilialiat ukioq 1981-imit 2006-ip tungaanut suliaapput.
Pia Ark'e kalaallimik anaanaqartoq qallunaamillu ataataqartoq kræftemik nappaateqarluni 2007-imi toquvoq.
Saqqummersitsineq TUPILAKOSAURUS, takuniarneqarluarsimavoq aammalu danskit aviisiinit, eqqumiitsuliortut aviisiinit nunallu allamiut aviisiinit nersualaarneqarluni allaaserineqarpoq.
Saqqummersitsinermik TUPILAKOSAURUS-imik suliaqartut Naalagaaffiup eqqumiitsuliortunut aningaasaateqarfianit nersornaaserneqarput.
Pia Ark'ep eqqumiitsuliai saqqummersinneqartut tassaapput assilisat 70-it sinneqartut, qalipakkat, videoliat, atukkiat taamatullu saqqummersitsinissamut atugassaminik paasiniaanermini atortui.
Pia Ark'ep eqqumiitsuliaasa Nunatta Katersugaasiviani saqqummersinneqarnerat tallimanngorpat marsip ulluisa tallimaanni ammaanersiorneqassaaq ualikkut sisamaniit tallimat tungaannut, kulturikkullu illorsuarmi Katuami ualikkut tallimaniit unnukkut arfineq pingasut tungaannut ingerlanneqassalluni.
Pia Ark'ep eqqumiitsuliai pillugit innuttaasut ataatsimiitinneqassapput sapaatiuppat marsip ulluisa arfineq aappaanni Kulturikkut illorsuarmi Katuami nalunaaqutaq ullup qeqqaniit ualikkut sisamat tungaannut, taamatullu Nunatta Katersugaasiviani oqallitsitsisoqassalluni pingasunngornermi marsip ulluisa qulingani unnukkut arfineq marluk qeqqaniit unnukkut qulit qeqqata tungaanut.
Pia Ark'ep assilialiai Nunatta Katersugaasiviani apriilip ulluisa sisamaata tungaanut saqqummersinneqassaapput.