Tupilak kisimi kalaallit kulturiannut ilisarnaataanngilaq
Kalaallit kulturiat pillugu Roskildemi nittarsaassinermi Inuit Nu-mik taasamik Iben Mondrup aaqqissuusseqataavoq, katersugaasivik Roskildemiittoq Museet for Samtidskunst suleqatigalugu.
Kulturimik nittarsaassineq Inuit Nu, aaqqissuussinernit allanit allaanerussuteqarpoq, siornatigut Danmarkimi takutinneqartartunit qaqutigoortuulluni.
Eqqumiitsuliortoq Jessie Kleemann aappaluttumik takisuumik atequtserluni, puugutalerluni orsumik tamuaalerluni katersugaasivimmmi isiginnaartitsivoq kalaallit kulturianni nuannersut maajunnartullu assigiinngitsut takutillugit.
Eqqumiitsuliortoq Julie Edel Harderberg plastikimik assiaqutilerluni atuaavoq, Kalaallit Nunaanni kalaallisuinnaq oqalulluni misigisani oqaluttuaralugu.
Nuka Bisgaard aamma Lu Berthelsen arnatut atisalerlutik qitipput.
Kalaallit kulturiat Danmarkimi takuneqarneq ajortup, saqqummiunneqarnissaa Iben Mondrupip pingaarnertut takutinniarsimavaa.
Kalaallit kulturiannik takutinneqartussatut naatsorsuutigineqartut akimorlugit suliaqarniarsimavunga, Iben Mondrup oqarpoq, tassalu qilaatersornerit, saanernik qiperuinerit aamma Roskildep kangerluani qaannamik kinngusaqattaarnerit saniatigut allanik takutsitsinissaq soqutinartissimallugu.
Kalaallit kulturiannik Danmarkimi aaqqissuussisoqaraangat, Kalaallit Nunaat kisiat pillugu saqqummiussisoqartarnera nalinginnaavallaarpoq. Eqqumiiginarpoq inuiaat immikkut inissittutut ilillugit takornartatut allaanerusutullu isigineqarlutik aatsaat takuneqarniartarmata, Iben Mondrup oqarpoq.
Kalaallit eqqumiitsulioriaasiat katersugaasivimmi Museet for Samtidskunstimi saqqummersinneqartoq torrallatarujussuuvoq, saqqummersitsinernut allanut atatillugu takutinneqarsinnaagaluarpoq, Kalaallit Nunaannut tunngassuteqaqqissaanngikkaluarluni, Iben Mondrup oqarpoq.
Kalaallit kulturiat Danmarkimi saqqummiunneqaraangat alianaalluinartutut imaluunniit alinartorujussuartut ingasattumik saqqummiunneqartarpoq, Iben Mondrup oqarpoq.
Eqqumiitsuliat isiginnaarneqarsinnaapput, allanneqarsimasut atuarneqarsinnaapput nipilersukkat tusarnaarneqarsinnaallutik taakkualu tamarmik Kalaallit Nunaannit pisuupput, allamik naamik, eqqumiitsuliortoq Iben Mondrup kalaallit kulturiannik Inuit Nu-mi katersugaasivimmi Museet for Samtidskunstimi saqqummersitsinermi aaqqissuusseqataasoq oqarpoq.
Katersugaassivimmi Museet for Samtidskunstimi kalaallit saqqummersitsinerat isiginnaartitsinerallu iluatsilluarsimasut, Iben Moundrupip ilanngullugu oqaatigaa.
Filmit, Echoes Ivalo Frankip filmiliaa aamma filmi Nuummioq katsersugaasivimmi takutinneqassamaarput.
