Tupilaat suli nassaarineqanngillat

Nunarsuarmi tamarmi eqqumiitsuliat tammaaneqarlutik Interpol aqqutigalugu ujaarineqartut arfiniliusut ilaat tassaapput saanernik tuugaanillu tupilliat 300-nit amerlanerusut, eqqumiitsuliallu naggueqatigiinnit inunnit sanaat allat.

Qiperukkat, nunarsuarmi eqqumiitsuliani nammineq pigisatut katersani amerlanersaasut siorna tillinneqarput, mannalu tikillugu suli nassaarineqanngillat.

Ujaasinermi Thistedimi politiit suliarinnittuupput.

Qiperukkat ujaarineqartut, assinik eqqumiitsulianillu saqqummersitsivimmi Galleri Pakhuset Krik-imi Thyp kujataani siorna tillinneqarput.

Thistedip politeeqarfiani politiassistent Anfinn Miklagaard suleqatitsinnit Martine Lind Krebsemit apersorneqarluni oqarpoq, ujaarineqartut pillugit ikittuinnarnit saaffigineqarsimallutik, saaffiginnissutilli iluaqutaasimanngitsut.

- Saaffiginnissutit aallaavigalugit misissuivugut, saaffiginnissutilli ujaarineqartut sumiissinnaanerannnut  iluaqutaanngillat, Anfinn Miklagard oqarpoq.

- Interpol ikiortigaaarput, ujarneqartut nunanut allanut aallarunneqarsimanissaat naatsorsuutigigatsigu, Annfinn Miklagard oqarpoq.

Saanermik qiperugaq Interpolip nittartagaanut ilanngunneqarpoq, ujarneqartullu assingi ukiumut pingasoriarlugit nittartakkamut ilaanngunneqartarput.

Eqqumiitsuliat nunarsuarmi tamarmi assiliarsualianerineqartarput, eqqumiitsuliallu saanermik qiperukkap assilialiuuneqarneranut pissutaavoq, qiperukkat nunani allani ujarneqartussaammata, nunanilu allaniinnissaat politiit qularutiginngilaat.

Danmarkimi eqqumiitsulianik taamaattunik katersisartut ikittuinnaapput, eqqumiitsuliallu Danmarkimi inuit arlaata sianiginagu  katersaatigissagaat Arnfinn Miklagardip naatsorsuutiginngilaa.

- Kalaallit Nunaaniissinnaanissaat ilimagineqarsinnaavoq. Kalaallit Nunaanni misissuereerpugut, Kalaallit Nunaat nunat allat assigalugit ujaasiffigissallugu soqutiginarsinnaavoq, Thistedimi politeeq oqarpoq.

Eqqumiitsulianik katersisartoq, Bjørn Wandall qiperukkanik ujaarineqartunik piginnittuuvoq.
Eqqumiitsuliat qanoq akeqarnerannik Bjørn Wandall oqaaseqarusunngilaq, taakkuali millionit koruuninik arlalinnik akeqartut oqarluni.

Interpolip nittartagaani tillinneqartut nunarsuarmi ujaarineqarnersaat takuneqarsinnaasarput:

http://www.interpol.int/Public/WorkOfArt/Poster/Default.asp