Tupermi allalerineq

Samit tupersuat Nunatta Katersugaasiviata silataani napparneqarpoq tassanilu isiginnaagassiaq "Aanngalerpugut" tallimanngorneq maajip 11-at takutinneqaqqaassaaq.

- Tupersuaq atorniarparput qanilaartumik misigineq pisinnaaqqullugu, Nunatta Isiginnaartitsivianit Svenn Bernhard Syrin oqarpoq.

Tupersuaq tassaavoq samit tupersuat lavvu naqqa ammalortoq tukimut 11 meteri. Tassani scene-qassaaq aammalu isiginnaartut 60-it inissaqassallutik.

Isiginnaagassiami allaavigineqarput kalaallit oqaluppalaavi oqalualaavilu Knud Rasmussenimit aamma H.J. Rinkimit allanneqarsimasut.

Aammalumi qilanaartuusiisoqarpoq Nuummi H.J. Rinksvej-mi radiohusitoqqami Nunatta Isiginnaartitsiviata sullivigisaani. Oqaluttuat oqalualaallu isiginnaagassiornermi aallaavigineqartut tassaapput "Manguaraq Aningaarlu", "Inuttuumasoq", "Toqunikut siutinik sianertitsisartut" kiisalu "Nuliaq allasiortartoq".

Isiginnaagassiami Pipaluk Kreutzmann Jørgensen ilitsersuisuuvoq isiginnaartitsisullu tassaapput Miki Thomsen, Angaju Lennert-Sandgreen aamma Else Danielsen.

Isiginnaagassiaq minutsit 50-it missaliorlugit sivisussuseqartussaq Nuutoqqami takutinneqassaaq maajip aqqarnaniit maajip 20-ata tungaanut. Tamatuma kingorna Paamiuni, Maniitsumi, Sisimiuni, Aasianni, Qasigiannguani, Ilulissani Qullissanilu takutinneqassaaq.

- Nuummi Qullissanilu tupersuarmi takutissavarput. Naatsorsuutigaarput illoqarfinni allani katersortarfinni takutittarumaarlugut, Pipaluk Kreutzmann Jørgensen oqarpoq.