Tupaallannartoq: Kiassarnermut akiliut 50 procentimik qaffalerpoq
Inissiaatileqatigiiffiup INIp qaammataanngitsumilluunniit sioqqutsisumik nalunaaruteqarluni kiassanermut siumoortumik akiliut 50 procentimik qaffannialerpaa.
- Nukissiuuteqarnermi akit uuliallu akia qaffassimapput qaffakkiartorlutillu. Aappassaannik ukiuunera ississimaqaaq, naatsoorsuutigineqareersumillu kiassarnermut atuinerusimavugut. Pingajussaannillu inissiaqarfiit kiassaateqarfiisa aserfallatsaaliornissaannut aningaasassaqarnissarput salliutinneqassasoq aalajangerneqarnikuuvoq, Berit Frydendal A/S Inimi attaveqarnermut pisortarigallartoq oqarpoq
Ineqarnermut siumoortumik akiliutit INIp 2011-mili kingullermik iluarsimmagit, uuliap akia marloriarluni naatsorsuutigineqarsimanngitsumik qaffassimavoq.
Attaveqarnermut pisortaagallartoq Berit Frydendal isumaqarpoq, qaammat ataasiinnaq atorlugu kiassanermut akiliutit qaffannissaannik ilimasaarineq naapertuuttuusoq periutsilu taamaattuusut. Taanna ilisimatitsivoq Nukissiorfinnut uuliaarnianullu akiliutigisartakkatik aningaasassaqartikkumallugit INI assiigiinngitsutigut naatsorsuisaqattaarsimasoq.
Ineqartut Peqatigiiffiisa Kattuffianni siulittaasoq, Marie Nielsen, inissiaatileqatigiiffiup INIp inaataani nammineq najugaqartutut, kiassarnermut akit qaffanneqarnissaanut allakkat takugamigit ingasagai.
- Ippassaq angerlarlunga allakkap puua ammarakku assut tupaallappunga takulerakku kiassarnermut akiliut 50 procentimik piffissap sivikitsup ingerlanerani qaffattussanngortoq. Soorumi ingerlaannaq eqqarsarpunga: Ingasappallaaqaaq, Marie Nielsen oqarpoq.
Ullumi A/S Ini-p aalajangernera siulersuisoqatini peqatigalugit eqqartorniarpaat kingusinnerusukkullu sukumiinerusumik nalunaaruteqassallutik.
INI-p suli oqaatigisinnaanngilaa, ininik attartortut kiassarnermut qanoq akiliinerutigissanersut, kisianni inissiani INI A/S-ip ingerlataani 10.000-usuni siorna siormoortumik akiliutit 106 millionit koruuniupput. Tassalu akiliutit 50 procentimik qaffappata, qaffariaat 50 millioner koruuniukutsoorsinnaavoq.
