Tunup Kujataani meqqit kisinneqarput

Pinngortitaleriffiup timmissat amerlassusiannik Tunumi Illoqqortoormiunit kujammut siullermeerluni misissuinerata takutippaa meqqit ilimagisamit ikinnerusut.
Allattoq Najaaraq Egede
marsip 23-at 2010 13:53

Meqqit naajallu piaqqiorfii nutaarpassuit manna tikillugu ilisimaneqarsimanngitsut nalunaarsorneqarput. Meqqit piaqqiortut aappariit ilimagineqartutut ikittuinnaallutik 1600-t 3200-llu akornanni amerlassuseqarput. Piaqqiortut amerlanersaat sumiiffinni aatsaat sikoqanngitsuniilersuniittut nassaarineqarput. Meqqit piaqqiortut ilaat nunatsinni sumiiffinnut allanut sanilliullugit sineriak atuarlugu ataasiakkaannguunertik allaanerussutigaat, tamanna Tunup kujataani terianniakinneruneranik pissuteqarsimagunarpoq, taama Pinngortitaleriffik nalunaarpoq.

- Manna tikillugu Tunup kujataa meqqit pillugit paasissutissat eqqarsaatigalugit ilisimasaqarfigineqarpiarsimanngilaq. Meqqillu nunatsinni piniagassat pingaarnerit ilagimmatigit tamaani qanoq amerlatigisunik miteqarnersoq paasissallugu pingaaruteqarpoq,” Flemming Merkel, kisitsinermut akisussaasuusoq oqarpoq.

Isasarnerat ilisimaneqarsimanngitsoq paasineqarpoq.

Sumiiffimmi meqqit piaqqiortut saniatigut meqqit 10.000-it sinneqartut Islandimi piaqqiortarnissaannik ilimagineqartut piaqqiornermilli kingorna Tunup kujataaliartartut sumiifimmiipput. Tassani sulumik meqqui katattarpaat (isasarput) taamaattumillu piffissap ilaani timmisinnaaneq ajorlutik. Taamatut isasarnerat siornatigut ilisimaneqarsimanngikkaluarpoq meeqqillu Islandimeersut suli amerlanerunissaat ilimagineqarpoq.