Tunup immikkut kommuninngornisaa Naalakkersuisut itigartitsissutigaat
- Tunu immikkut kommuninngorpat, tunumi kommunemi qinikkat qanimut oqaloqatigisinnaalissavagut, taama oqarpoq Egon Poulsen, Tasiilaq.
Tunumi innutaasunik atsiortitsinermik 2014-imi katersigami, Tunu kommuneqarfik Sermersuumit avissaarluni namminerisaminik kommuninngornissaa anguniarneqarpoq.
Aamma atuaruk Tunumiut maluginiarneqanngitsutut misigisut
Kommunip avinneqarnissaanik atsiornernernik katersorneqartut 500-it missaannik amerlatigisut, Egon Poulsenip Naalakkersuisunut 2015-mi tunniuppai, maannalu tassa Naalakkersuisut akissuteqarnerminni kissaatigineqartoq itigartitsissutigaat.
Tamanna atuarneqarsinnaavoq Naalakkersuisut siulittaasuata Kim Kielsenip Egon Poulsenimut allagaani.
Allakkami allassimavoq kommuni avinneqarnissaa maanakkuugallartoq oqaluuserineqartariaqanngikkallartoq, misissueqqissaarnerit takutimmasut kommuunit kalluarneqartussat aningaasartuutaat annertuumik unammilligassaqalissasut.
Naalakkersuisut siulittaasuata allagaani ilaatigut allaasimavoq issuaaneq aallartippoq:
"Kommunit mikinerusut arlallit ataaserluunniit kommunit suliarisinnaasaannut suliassanut sunniuteqarnerlussapput. Kommunip mikinerpaap pisinnaasaa kommuninut tamanut killiliissaaq taamannalu tunngavigalugu Kommuneqarfik Sermersuup avinneqarnissaanik kissaateqarneq Naalakkersuisut akuersaanngilaat"
Naalakkersuisut siulittaasuata Kim Kielsenip Egon Poulsenimut allakkani taama naggaserpaa.
