Tunup avannaarsuani taseq qaarluni imaarpoq
DMI-meersut novembarip 26-anni satellittimiit assilisanik misissuitillutik malugilerpaat, kangerluup ukiarli sikoreernikup qaava paasiuminaatsumik nerumissuseqartoq, soorlu ilimanarsilluni kangerlummi aakkarneqartoq.
Tamanna DMI-mit eqqumiigeqaat, tamaanimi meterip affaatut issutigisumik massakkut sikoqartussaagaluarpoq, sapaatit akunnerini arlalini issisiut 20-miittuarmat.
Satellittimiit assilisat assigiinngitsut misissornerisigut paasinarsivoq, Zackenbergip kuuata akuaniit kangerliumaneq tamakkiusarlugu 5 kilometerisut annertutigisumik uillup qaleruaatut ittumik simerneqalersimasoq.
Zackenbergimi ilisimatusarfimmiit aammalu Siriusimi qimussimik nakkutilliisuniit ikiorneqareerlutik DMI-miit ilimagilerpaat qanoq pisoqarsimassasoq.
Zackenbergip kuuata timaani sermip iigartartup tasia imaarsimassaaq, imerujussuarlu nunakkut ammut 35 kilometerisut isorartutigisukkut kuup akuanut kuussimassalluni.
Imeq kuuttoq kuup akuani sikumut ingerlaqqissimassaaq tamannalu simertillugu, silaannarsuarmiit assilisani maanna takuneqarsinnaasumik.
Siriusimit qimussimik nakkutilliisut, simernermik alakkaasimasut nalunaarput, naak 20-nik issikkaluartoq ullullu sisamat qaangeriutereeraluartut, kuukkut suli seersinneqartoq.
Imermik aassimasumik kuttoqallaraagat, sermersiuunit jøkelløbimik taaneqartarpoq, tassagooq sermip ataani putumi aanneq qannilluni qaarnermigut sermeq kivikkaa.