Tunup avannaarsualerngusaanneq ileqimisaartuutigineqarpoq
Tunup avannaata Kalaallit Nunaata pigineraa piginnginneraaluunniit oqallisigineqarpoq, sulilu oqallisigineqarnera naammassivinnani.
Dansk Folkepartiimeersoq Søren Espersen aammalu konservative-t Kalaallit Nunaanut tunngasunik oqaaseqartartuat Per Ørum Jørgensen tunup avannaata kikkunnit pigineqarnissaa pillugu nutaarsiassaqartitsivimmut ritzauimut oqaaseqarmata tamanna oqallisigineqarluni aallartinneqarpoq.
TV2-p nutaarsiassaqartitsiviani ippassaq tamanna pillugu Per Ørum Jørgensenip itisiliisinneqarluni oqaaseqartinneqaqqippoq.
- Danmarki tamatuma tungaatigut tunuarsimaassanngilaq, taama Per Ørum Jørgensen TV2-mut oqarpoq.
Konservativelli suleqatigiissitaliaasa siulittaasuannit Helge Adam Møllerimit inissinneqarpoq, taanna ima oqarpoq:
- Qularutigineqassanngilluinnarpoq nunarujussuaq Kalaallit Nunaata tunuata avannaaniittoq, Kalaallit Nunaanilu uuliaqarsinnaanera kalaallit pigissammatigit, taama Helge Adam Møller oqarpoq.
- Det Konservative Folkepartimiit kissaatiginngilarput Kalaallit Nunaata immikkoortiterneqalernissaa. Qularutigissanngilarpummi Kalaallit Nunaata tunuata avannaarsua Kalaallit Nunaata sinneranut atammat, taamaattuaannarsimavoq aamma siunissami taamaattuaannassaaq, taama Helge Adam Møller allakkatigut erseqqissaavoq.
Tunup avannaarsuata piginnittussatigut apeqquserneqarnera nunami maani ileqimisaartuutigineqarluni isorineqarpoq, ilaatigut oqaatigineqarluni tunup avannaa ukiorpassuarni najugaqarfigineqartuusoq.
- Søren Espersenip atuarfimmi oqaluttuarisaaneq pillugu sammisaqarnermi nalaani qaangiinnagaqarsimarpasippoq, tassami Kalaallit Nunaata tunuata avannaarsua ukiuni tusindtilikkaani qaangiutereersuni inunnit najugaqarfigineqartuartarsimavoq, taama radio aviisimut oqarpoq itsarnisarsiooq Claus Andreassen.
