Tunup Avannaani Ilisimatusarfik nutarterneqalerpoq

Ilisimatusarnermut Tunup Avannaarsuani misissuiffik, Zackenberg, Aage V. Jensen-ip aningaasaateqarfianit 6,5 millioni koruuninik aningaasaliiffigineqareernermi kingorna ukiup tulliani nutarterneqartussanngorpoq. Illumi tassani 161 kvadrat meterinik angissuseqartumi inunnit 23-init ulapaarfiunerpaap nalaani najugaqarfigineqarsinnaasunik ineeqqanik qulingiluanik sanasoqassaaq. Ilisimatusartut tikeraartullu allat malugusulissagunaqaat, mannami tikillugu illuaraasat tupermik qulisat kisimik inigineqarsinnaasimapput. Sarfaliuummut illuarassamik aamma sanasoqassaaq. Sannavimmik anngajaarsuarmik biilinullu inissiisarfissamik illuaqqami tassani aamma sanasoqarniarpoq.

Ukioq 2007-imiit 2009 ilanngullugu tassaasussaavoq Nunarsuaq tamakkerlugu Issittup Ukiua, tamannalu unamminartussaammat, tassunga atatillugu Ilisimatusarnermut misissuiffiup ukioq naallugu ammasalersinnaanissaa neriuutigineqarpoq, maannakkut ukiumut ullut 100-iuinnaat ammasaraluarluni.

Nunatsinni ilisimatusarneq Aage V. Jensen-ip aningaasaateqarfianit ukiuni kingullerni assut soqutigineqaleriartorpoq. Sorpassuarnut anigaasalereerluni maanna Tunup Avannaarsuani Ilisimatusarfimmut maanna aningaasaliivoq.

Pinngortitaleriffik, ilisimatuumik ukiuni tallimani tassani atorfinitsitsineq, Tunullu Avannaani Daneborgimi misissuivimmut angallatitaarneq Aage V. Jensen-ip Aningaasaateqarfiata siusinnerusukkut aamma aningaasaliiffigisimavai. Tunup Avannaani piniartut illuaraat qanganitsat ataavarnissaat anguniarlugu Kattuffik Nanoq aqqutigalugu aamma aningaasaliinikuuvoq.