Tunup avannaani aamma uuliasiorumapput
Uuliasiorluni gassisiorlunilu misissuinissamut qalluinissamullu akuersissummik qinnuteqaatit 11-it Aatsitassanut Ikummatissanullu Pisortaqarfimmit tiguneqarput, qinnuteqarfissaq 15. december nallermat, Aatsitassanut Ikummatissanullu pisortaqarfik tamaatut nalunaarpoq.
Qinnuteqaatit pitsaanerpaat toqqarneqannginneranni nalilersuinerit isumaqatiginninniarnerillu annertuut ingerlanneqarnissaat tullinnguuppoq.
- Neqeroortitsinerup inernera Kalaallit Nunaanni piffissamut ungasissumut aammalu piujuartussamik inuiaqatigiit aningaasaqarneranni angusaqarnissami killiffiuvoq pingaaruteqartoq, Aatsitassanut Ikummatissanullu Naalakkersuisoq Ove Karl Berthelsen oqarpoq.
- Grønlandshavet-imut pisinnaatitsissutinut politikki, neqeroortitsinernut iluatsilluartumik siusinnerusukkut ingerlassimasatsinnut pissusissamisoortumik nangissutaapput, aammalu Tunup avataata imartaanut soqutiginninneq, Kalaallit Nunaata kitaata imartaanut siusinnerusukkut neqeroortitsinermi takusimasatsitut, taamatuttaaq annertutigisoq takullugu nuannersorujussuuvoq, Naalakkersuisoq Ove Karl Berthelsen oqarpoq.