Tunup allatut pilersorneqarsinnaanera ilimananngikkallarpoq

Attaveqarnermut Angallannermullu Naalakkersuisoq, Jens B. Frederiksen, akissuteqaammini allappoq, Royal Arctic Line-ip pilersuisarneranut akuersissut atorunnaarsinneqassagaluarpat tamanna "inuiaqatigiit aningaasaqarnerannut annertuumik sunniuteqassasoq"-imik Attaveqarnermut Ineqarnermullu ataatsimiititaliap oqarnera isumaqatigilluinnarini.

Nunat Avannarliit Killiit Siunnersuisoqatigiiffiata Naalakkersuisut aggustimi kaammattorpai, Tunup allatut pilersorneqarsinnaaneranut periarfissamik misissueqqullugit, pilersuisussaatitaanermut isumaqatigiissutip atuuttup tamatumunnga aporfissaqartitsisinnaaneranik naliliinertalerlugu. Jens B. Frederiksenillu akissutaa ippassaq tassa takkuppoq.

Royal Arctic Line-ip allamit taarserneqarnissaa Jens B. Frederiksenip ernummatigaa, tassamigooq illoqarfiit annerit kisimik pilersorneqartalernissaat annilaanngatigigamiuk, Royal Arctic Line-illi sipaarutissanik atuilersitsiniarnera Jens B. Frederiksenip aamma nersualaarpaa.

Naalakkersuisulli ingerlaannaq misissuinialerput, tikkuarluguli pisariaqartoq "peqqissaartumik isumatusaartumillu ingerlatsinissaq", aammalu "pinasuartumik aalajangiipallattoqannginnissaa pisariaqartoq" suliassami matumani pisariaqarnerarlugu.

Tunup allatut pilersorneqartarsinnaaneranut siunnersuut Inatsisartuni ullumi aappassaaneerlugu oqaluuserineqassaaq.