Tunumut takornariat amerliartorput
Takornarniartitsivimmi pisortap, Mike Nicolaisenip, oqarnera naapertorlugu, Islandimi timmisartuutileqatiogiiffiup, Air Icelandip, suleqatiginera aamma Kulusummiit Reykjavikimut timmisartuussisarneq takornarniat amerleriarnerannut pissutaavoq.
- Angallaffiunerpaap nalaani Dash-8-taat atorlugu ullormut pingasoriarluta sisamariarlutaluunniit timmisartuussisarpugut. Suleqatigiinneq taanna takornarniaqarnerup tungaatigut ingerlalluarnermut pissutaalluinnarpoq, Mike Nicolaisen oqarpoq.
Kisianni Kulusuup Tasiilallu akornanni qulimiguulimmik timmisartuussisarsinnaasumik Mike Nicolaisen ujartuivoq. Timmisartuutileqatigiiffik Air Greenland, tamaani timmisartuussisarpoq, amigartoorutilli sapinngisamik annikillisinniarlugit timmisartuussisarnini ikilisarniarpai. Nunatsinni Takornariaqarnermi Inuussutissarsiornermilu Siunnersuisoqatigiit pisortap isorai, oqarluni, aningaasat Kitaani takornarniaqarnermut atornerusaraat.
Mike Nicolaisen isumaqarpoq, Tunumi timmisartuussisarnerit tusiapillaaqisut Nunatsinni Takornariaqarnermi Inuussutissarsiornermilu Siunnersuisoqatigiit Namminersortullu aningaasaliiffigisariaqaraat.
- Tunumi tuniniaanissamik suliutinut aningaasanik Nunatsinni Takornariaqarnermi Inuussutissarsiornermilu Siunnersuisoqatigiit immikkoortitsisariaqaraluarput, Air Icelandip Icelandairillu uagutsinniit suleqatiginissaat eqqarsaatigalugu, Kulusuup Tasiilallu akornanni qulimiguulimmik timmisartuussisarneq pitsanngorsarniarlugu Air Greenland GTE-p aningaasaliiffigisariaqaraluarpaa, Takornarniartitsivimmi Arctic Wonderlandimi pisortaq, Mike Nicolaisen naggasiivoq.
