Tunumi nunaqarfinnut takornariaqartitsinerup ineriartortinneqarnissaa siunertaralugu, takornariaqartitsisutut sulilersussat ullumi Tasiilami isumasioqatigiissinneqarput. Isumasioqatigiissitsinermilu peqataasut ilaat Dines Mikaelsen oqarpoq, nunaqarfiit Tunumiittut tamarmik assigiimmik akeqartitsillutik takornariaqartitsinermi neqerooruteqassasut, nangipporlu: - Piniartuunerup ilungersunartunngoriartornerata takutippaa saniatigut aamma inuuniuteqartariaqarnissaq. Taamaammat nunaqarfiit periarfissikkumavagut takornariaqartitsinermik pitsaasumik sullissisinnaanissaat, Dines Mikaelsen oqarpoq.
Peqataasut takornariaqartitsinermi sulinerulersussat septembarimi naapeqqissapput, tassanilu suliap killiffaia nalilersorneqassalluni.
Dines Mikaelsen Tasiilamit taama oqarpoq. Ukiorpassuarni takornariaqartitsinermik suliaqarsimavoq, Tasiilamilu takornariaqartitsiviup allaffiani pisortaanikkuulluni, ukiut marluk matuma siorna tikillugu. Dines Mikaelsen aamma piniartuuvoq.
